Urkunde Nr. 2045 aus Band IV

Seite im UB:

350-351

Druckvorlage:

nach anderem Urkundenbuch

Abdruck als:

Volltext

Sprache:

Latein

---

2045

Kubin 1428 Juli 3 König Sigmund befiehlt seinen Berggrafen in Klein-Schlatten, die Freiheiten der Bergleute zu achten und ihnen die Einkünfte in Gold nach der Kremnitzer und Neusohler Gewohnheit auszufolgen.

Sigismundus dei gratia Romanorum rex semper augustus ac Hungariae, Bohemiae, Dalmaciae, Croaciae et cetera rex fidelibus nostris comitibus urburarum nostrarum in montanis nostris Zlathnabanya vocatis nunc constitutis et in futurum constituendis, praesentium noti- [S. 351] tiam habituris, salutem et gratiam. Pro parte fidelium nostrorum universorum et singulorum civium, hospitum et montanistarum in locis montanis nostris commorantium celsitudini nostrae exponitur gravi cum querela, quod saepe contingeret, quod comites ipsarum urburarum nostrarum per nos constituti¹⁾ medio ipsorum in primo ipsorum accessu et introitu universas libertates, iura et libertatum praerogativas per divos reges Ungariae nostros scilicet praedecessores et consequenter per nostram maiestatem eis gratiose concessas laudabilesque ipsorum consuetudines et observantias illibate et irrefragabiliter observare permittant, tamen expost huiusmodi libertatibus, consuetudinibus abiectis, proventus ipsorum in auro et flore auri secundum tabulam et consuetudinem dictarum montanarum nostrarum ipsis extradere, literas etiam nostras regales et alia literalia ipsorum instrumenta in suis vigoribus observare recusarent, in eorum praemissarum libertatum, praerogativarum derogamen valde grande. Super quo supplicatum exstitit, ut²⁾ eisdem exponentibus per nostram maiestatem opportune provideretur.³⁾ Et, quia nos libertatibus laudabilibus et consuetudinibus ipsarum montanarum nostrarum, consequenterque civium, hospitum et montanistarum earundem per quospiam nolumus indebite derogari, igitur fidelitali vestrae [et] cuilibet vestrum firmiter praecipiendo mandamus, quatenus a modo in antea, cessantibus universis novitatibus ac abusivis consuetudinibus per vos in contrarium praemissarum literarum praedecessorum nostrorum et consequenter nostrarum indebite introductis et introducendis, praedictos cives, populos et montanistas nostros eorum iustis libertatum praerogativis, gratiosis indultis laudabilibusque consuetudinibus supradictis libere et pacifice absque aliquarum novitatum adinventarum et introductarum abusu uti, frui et gaudere permittatis praedictasque literas dictorum nostrorum praedeccessorum et consequenter nostras iuxta suos vigores observando, praedictis proventus ipsorum in auro et flore auri eis iuxta tabulam et consuetudinem eorundem et aliarum montanarum nostrarum et signanter Crempniciensis et Bistriciensis reddere [et] extradere debeatis. Secus nequaquam facere ausuri in praemissis gratiae nostrae sub obtentu. Praesentes etiam perlectas reddi iubemus praesentanti. Datum in Keve, secundo die festi visitationis virginis gloriosae, anno domini millesimo quadringentesimo vigesimo octavo, regnorum nostrorum anno Hungariae quadragesimo primo, Romanorum XXVIII et Bohemiae octavo. [S. 352]


1) Vorlage: constitutarum.^{^}
2) Vorlage: et.^{^}
3) Vorlage: providendum est.^{^}