Urkunde Nr. 2055 aus Band IV

Seite im UB:

369-371

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Kirchenarchive A.B. [Colecţia de documente ale parohiilor ev. CA săseşti] Serie II (Inventar 228), Nr. 501 - Abt. 7: K. A. Heltau [Parohia Ev. CA Cisnadie], Nr. 12.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

2055

1428 November 30. Die Sieben Stühle entscheiden einen Grenzstreit zwischen den Gemeinden Michelsberg und Heltau.

Nos iudices et iurati consules septem sedium Saxonicalium partium Transsiluanarum Jacobus magister civium, comes Andreas, Nicolaus Pheffersack Cibinienses, comes Heidericus de Alczna, comes Jacobus de insula Jerardi, Laurencius et Petrus comites de Ruffomonte cum universis iuratis senioribus partium praedictarum memoriae commendantes tenore praesentium quibus expedit significamus universis, quod honorabilis vir frater Michael monasterii virginis gloriosissimae abbas de Candelis cum honesto viro domino Bartholomeo plebano de villa sancti Michaelis et providis senioribus de eadem parte ab una et vir honestus do- [S. 370] minus Johannes plebanus de Helthaw suis cum providis senioribus villae praenominatae parte ab altera nostram accesserunt praesentiam pro quadam portione territorii in suis limitibus dimensionati litigantes et in notabilis controversiae materia persistentes, quam territorii portionem seniores de Helthaw forma sub arrestae sibimet ipsis et senioribus et hospitibus de villa sancti Michaelis nitebantur praeservare. Reclamantibus autem et contra dicentibus senioribus de sancto Michaele prohibitionem factam et arrestam, ne tali ex vicinorum discrepantia et discordia periculum aliquod, quod absit exsurgeret et oriretur, ipsis tam de una quam de parte opposita pacis commoditatem faciendam cupientibus et firmandam placuit omnibus, quod compositionem et ordinationem dictae portionis territorii anno domini millesimo quadringentesimo undecimo¹⁾ tempore honorabilis viri fratris Pauli abbatis pro tunc per famosum virum dominum Conradum castellanum de Thalmasch nomine et persona regiae serenitatis iudicem constitutum, et per circumspectos et prudentes viros comitem Andream iudicem regium Cibiniensem et comitem Laurencium de Ruffomonte iudicem sedis Reusmarck, ac alios septem sedium nomine constitutos, factam et conclusam firmaremus. Nos vero iudices et iurati seniores universi septem sedium percipientes utrarumque partium querulosam discordiam bonitate convincere et amore, volumus cuilibet parti satisfacere, velut nostra interest praememoratam controversiam sedandam duximus nulli parti usum et fruitionem a meta quae Phenningsyffen dicitur sursum tendendo, versus virgulta et nemora, denegantes vel abiudicantes sed unicuique parti usum et fruitionem a praenominata meta ut praemittitur ascribentes decrevimus adiudicare et cum praesentium vigore adiudicamus, ita quod praenominata territorii portio per arrestae et occupationis modum amplius et deinceps numquam debet, quovis modo per seniores et hospites de praefata Helthaw in praeiudicium et derogamen²⁾ senioribus et hospitibus de villa sancti Michaelis praeservari. Insuper adiecimus quod cum pascua a meta Daansiffen nuncupata tendendo sursum pecudibus et iumentis hospitum et incolarum de Helthaw prohibita et vetita non exstiterint, ex tunc sine cuiuslibet damni permissione et illatione, iumenta hospitum et incolarum de monte sancti Michaelis eisdem pascuis habent perfrui in ipsisque eorum iumenta possunt atque valent educari. Unde ipsi seniores et hospites de monte sancti Michaelis praenominato ac eorundem posteri senioribus et populis de Helthaw saepedictis singulis annis ad unius floreni puri auri solutionem sunt astricti, quemadmodum iidem de monte praenominato sancti Michaelis a multis praeteritis annis tamquam obligati ad solvendum coacti exstiterunt, et seniores ac tota de Helthaw communitas praememoratos montis sancti Michaelis hospites ad solutionem census amplioris nec [S. 371] habent nec debent praesumentes exactionare et taxare. Quam compositionem et ordinationem factam per nos sic ut praemittitur si quis vel qui ex ipsis ausu temerario violaverit vel violaverint infringendo, poenam decem marcarum puri argenti se noverit vel noverint incursurum vel incursuros, quarum medietas provinciali nostrae camerae altera vero medietas iniuriam patientibus videlicet parti compositionem non reclamanti cernitur praesentanda. Ne igitur ignorantia post aliquot lapsum temporis sit fons et origo talismodi novae dissensionis et exsistat praevisae causae renovatio, tunc praesentes literas senioribus et hospitibus de villa praedicta Helthaw duximus conferendas. Unde et senioribus et incolis de villa sancti Michaelis harum literarum tenorem punctualiter et conformiter se praesentibus literis habentem favorosius duximus concedendum. In cuius rei memoriam perpetuamque firmitatem praesentes nostras literas provinciali sigillo consignatas duximus muniendas. Datum die festo beati Andreae apostoli, anno domini millesimo quadringentesimo vigesimo octavo.


a) Ergänzt im Nachtrag UB IV, Seite 726.^{^}
b) Weitere Überlieferung frdl. Hinweis Gernot Nussbächer.^{^}

1) Vgl. Nr. »1661. ^{^}
2) Vorlage: occupamen.^{^}