Urkunde Nr. 2276 aus Band IV

Seite im UB:

620-622 ^a)

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Kapitel Hermannstadt [Capitlul evanghelic CA Sibiu] (Inventar 298), Urkunden Nr. 19.

Druckvorlage:

nach Original

Abdruck als:

Volltext

Sprache:

Latein

---

2276

Bologna 1436 Dezember 20 Papst Eugen IV. beauftragt den Bischof von Siebenbürgen, dem Dekan des Hermannstädter Kapitels das Recht der Rekonziliation von Kirchen innerhalb dieses Kapitels zu erteilen.

[S. 621] Eugenius¹⁾ episcopus servus servorum dei venerabili fratri episcopo Transsiluano²⁾ salutem et apostolicam benedictionem. Pastoralis officii debitum mentem nostram excitat et inducit ut ad ea quae pro ecclesiarum omnium necnon Christi fidelium statu et indemnitate accomoda et utilia fore conspicimus apostolicae partes sollicitudinis exquisitius impendamus. Sane pro parte dilecti filii Cristanni decani decanatus Cybiniensis partium Transsiluanarum nobis nuper exhibita petitio continebat, quod infra limites dicti decanatus qui in finibus paganorum, scismaticorum et Turchorum necnon christianae religionis inimicorum consistit, et ab olim de dioecesi Melkowiensi, cuius sedes episcopalis ad praesens per infideles occupatur esse consuevit continens sexaginta vel circiter parochiales ecclesias, quarum rectores ne illarum parrochiani sine superiore esse noscantur de consensu omnium unum ex eisdem rectoribus quem ad hoc magis idoneum esse diiudicant in decanum eiusdem decanatus eligunt, cuius electionem venerabilis frater noster archiepiscopus Strigoniensis confirmat et qui plenariam in spiritualibus et temporalibus infra dictos limites iurisdictionem necnon iudicandi in causis maioribus et minoribus ac instituendi, destituendi et confirmandi ac alia quae iurisdictionis sunt exercendi sicut archiepiscopus cuius vices gerit habet potestatem, tamen circa ea quae ordinis aut consecrationis sunt nulla fungitur potestate. Cum autem sicut eadem petitio subiungebat plerumque habitatores et incolae dicti decanatus in cimiteriis dictarum ecclesiarum ac locis contiguis et praesertim, cum partes illas infideles invadunt, propter maiorem securitatem moram trahunt, ac in turribus et locis eminentioribus dictarum ecclesiarum defensiones et propugnacula contra inimicos faciunt, et sic cum uxoribus suis et mulieribus in ecclesiis et cimiteriis conversantur, unde nonnunquam contingit ecclesias et cimiteria praedicta sanguinis aut seminis effusione pollui et etiam violari ac venerabilis frater noster archiepiscopus Strigoniensis propter nimiam distantiam, quae est decem vel duodecim dietarum ad ecclesias et cimiteria praedicta pro illis reconciliandis accedere commode non potest et in locis vicinis episcoporum copia non exsistit, et propterea nonnunquam ecclesiae et cimiteria praedicta absque reconciliatione remanent diutius ut profana in non modicam divini cultus diminutionem ac dictorum parochianorum animarum periculum et iacturam. Quare pro parte dicti decani nobis fuit humiliter supplicatum, ut super his opportune providere de benignitate apostolica dignaremur. Nos igitur, qui de praemissis certam notitiam non habemus huiusmodi supplicationibus inclinati fraternitati tuae per apostolica scripta mandamus, quatenus super praemissis omnibus et singulis eorumque circumstantiis universis auctoritate nostra te diligenter informes et si per informationem huiusmodi ita esse inve- [S. 622] neris praefato decano, ut decanus ipsius decanatus pro tempore existens onmia et singula ecclesias et cimiteria infra dictos limites consistentia quotiens illa vel illorum aliquod sanguinis vel seminis effusione pollui vel violari contigerit reconciliare possit dioecesanorum locorum et aliorum quorumlibet super hoc licentia minime requisita, aqua per decanum dicti decanatus pro tempore existentem ac vino et cinere prius benedictis eadem auctoritate licentiam largiaris, non obstantibus constitutionibus et ordinationibus apostolicis ceterisque contrariis quibuscumque per hoc autem constitutioni quae id praecipit per episcopos tantummodo fieri nullum volumus imposterum praeiudicium generari. Datum Bononiae, anno incarnationis dominicae millesimo quadringentesimo tricesimo sexto, tertiodecimo Kalendas Januarii, pontificatus nostri anno sexto.

Unter der Plica links: Mar.

Auf der Plica rechts: Regestra gratis. Pro H. Senfftleben Fl. II.
A. Schonaw IIII.

Auf der Rückseite vom Schreiber der Urkunde:
Ja. Goyer.
Arnoldus.

Von der Kanzlei: A. Regestrata.¹⁾

Auf der Rückseite von einer Hand des 15. Jahrhunderts: Bulla Eugenii papae quarti de et super reconciliationibus ecclesiarum violatarum per decanum fiendis.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1-2 auf S. 621, 1 auf S. 622.^{^}
[S. 621]
1) Е in vergrösserler Schrift.^{^}
2) sc. Georgio Lepes.^{^}
[S. 622]
1) R mit eingeschriebenem An.^{^}