Urkunde Nr. 4828 aus Band VIII
- Heute in:
- Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]
- Heutige Signatur:
- Urkundensammlung [Colecţia de documente medievale], Serie U. V, Supplementa (Nova Collectio posterior) (Inventar 27), Nr. 1175.
- Druckvorlage:
- nach Original
- Abdruck als:
- Volltext
- Sprache:
- Deutsch
4828
Hermannstadt 1489 September 18 Der Übeltäter Simon Roth von Klausenburg schwört dem Hermannstädter Rat Urfehde. Orig. Pap. Staatsarch. Hermannstadt, U V 1175. Zwei Ringsiegel, oval, in grünes Wachs vorne aufgedrückt. 1. Antiker Faun, halb Mensch, halb Bock, der sich mit der Linken auf einen Stab stützt und in der Rechten eine Figur hält. An Sessel gelehnt. 2. Hängende Glocke in Wappenschild.
Regest: Korrespondenzblatt (
») XXIX, 1906, 12 Nr. 3.
Ich Roth Symon von Clausenburg bekenn ein recht und redlich durch dissen kegenwertigen brieff fur mich und all mein nachkomlich allen den her fur kumblt zw lesen ader zw hoeren, wy das ich von meinen vbertretten wegen bin kumen in gefenknusz auff der Scheszburg vnd do mich ausz dem fegencknisz freblichen entprochen, hab durch all mein krafft vnd list vnd darnoch in der Hermanstat durch klag vnd czeyhung der selben dy mich vormals gefangen haben zu dem andern mal haben lassen fehen durch dy dyner der selben namhafftigen vnd weysen herrn in der vorgenanten Hermanstat vnd do pillichen von den selbigen herrn gevrteilt vnd getoedt het mügen werden von wegen meines geweltigen vbertretten vnd mich selber schuldig geben hab von wegen des anzeyhen vnd meines enttrynnen wegen ydoch vond wegen barmhertzikeit so haben mir mein namhafftige herren ausz der vorgenanten stat Cibini genad gethan vnd durch ir bet sy gesenffmutigt haben meinne Widersach wider welche ich gethan hab vnd also sag ich grosse danckperkeit vnd verschreib mich meinen namhafftigen Herren ausz der Hermanstat vnd allen herren vnd allen gemenyn hy vnd anderswo auch den lewten, dy mich haben lassen fehen in vnd allen iren nochkomen, des ich des gefengnusz nymer gedencken wil noch rechen wil weder ich noch dy meinen, weder durch tatt noch rad vnd ob ich gefunden vorbasz wurd in solchen sachen oder in solcher freblichkeit also sal das urteil vber mich gen, das ich vor hin verdint het, on alle genad. Vnd von wegen mangels meines eygenen sygel so hab ich gebetten dy ersame vnd weysse herren Steffan Marckgreff vnd Martine Clockengisser alle geschworne burger in der selb gemelter Hermanstat, das sy ire gewonliche sygel gedruckt haben vnnten an diesen brieff in vnd iren erben on schaden durch geczeugnusz willen. Das ist geschehen in der czeitlich genanter Hermanstat am Freitag nach des heiligen Kreutzes tag im herbst im LXXXIIII jare.