Urkunde Nr. 5948 * aus Band VIII

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Zunftakten und Zunftregister [Acte şi registre de breaslă] (Inventar 33), Nr. 503 (Zunftbuch der Hermannstädter Schneider, Vol. II), pag. 10-13.

Druckvorlage:

nach Abschrift

Abdruck als:

Volltext

Sprache:

Deutsch

---

5948 *

1499 Die Hermannstädter Schneiderzunft ergänzt ihre Satzungen von 1485.

Item darnoch, wy vil ellen ein magister sal haben pernisch gewannt zw eyner gwgel.
Item darnoch, wy vil ellen pernisch gewannt man sal haben zw eyner prelaten gwgel.
Item darnoch, wy vil ellen samat man sal nemen zw einer kassel.
Item darnoch, wy vil ellen samat man sal nemen zw einer korkappe.
Item darnoch, wy vil ellen samat man sal nemen zw zwayen dinst röcken.
Item darnoch, wy vil ellen ein munch sal haben zw einem rock vnd zw einer kappe.
Item darnoch, wy vil ellen samat ein herr sal nemen zw eyner schawberg.
Item darnoch, wy vil ellen pernisch gewannt ein hoffman sal haben zw joppen vnd hossen.
Item darnoch, wy vil ellen pernisch gewannt ein hoffman sal haben zw einem Schwebischer rock vnd zw einer gwgel.
Item, wy vil ellen taffat ein herr sal haben zw einem rock mit flwgeln über den harnysch.
Item darnoch, wy vil ellen taffat zw eyner deck wber ein ross.
Item, wy vil ellen taffat zwayen narren zw iren rocken.
Item, wy vil ellen ein herr sal haben pernisch gewant zw einer sattel deck mit dreyen zöppen.
Item, wy vil ellen zwilch man sal haben zw einem gezelt zehen ellen hoch.
Item, wy vil ellen mechlisch ein pawer sal haben zw einem vier stückichem rock auf ein ander gefalt.
Darnoch zw einer gwgel mit einem wberschlag.
Item darnoch, wy vil ellen pernisch ein fraw sal haben zw einem mantel mit einem auff gesazten saum.
Item, wy vill ellen pernisch ein fraw sal haben zw einem gefallten seydel mit kwtten.
Item, vil ellen pernisch ein fraw sal haben zw einem schwrckysch.
Item, wy vill ellen pernisch ein fraw sal haben zw einem echt stückichem rock.
Item, wy vill ellen pernisch ein fraw sal haben zw einem schlymychten mantel.
Item, wy vil zw einem selb wachssen hentschuch.
Item, wy einer fwsslinck wil machen an gestrickt hossen.
Item, wy vil ellen taffet vnter ein pernisch.
Item, wellicher maister kawfft gewanth, das da verfawlth ist vnd pey im fyn, es sey an gewanth oder an klayder, das wirt man in dy zech nemen an alle genath.¹⁾
Item, welcher mayster gewanth kauft vnd theylt das myth eynem, der do nycht yn der zech yst, vorfehlt 1 pfunt wax.¹⁾

Item disse hernach geschriben artickel haben gemacht vnd beschlossen mit gantzer eintracht alle ersamen herren vnd mester in der gantzen czech:
Item am ersten, welcher mester ein jungen wil auff nemen zw versuchen das hantwerck, der sal dass thun mit wyssen der czechmester nit lenger wann vierzehen tag.
Item, welcher mester wil auff nemen einen lerjungen, da sullen vntter augen sein czwen czechmester auff das wenigst. Der selb jung sal nyder legen pey dem almasch in dy czech vier gulden vnd vier eimer wein vnd vier pfunt wax vnd seinem lermester auch vier gulden vnd sal im dynnen vier gantzer jar.
Item darnoch, wann ein solcher lerjung aus hat gedint seinem lermester vier gantze jar, so sal der selb mester von dem selben tag bys wber vier jaren keinen lerjung auff nemen.
Item, welcher mester wil werden in vnser czech vnd sich ein richt, der selb mester sal in den ersten vier jaren keynen lerjungen auff nemen.
Item, welcher mester dysse artickel, an diessem plat geschriben, wirt wbertretten vnt wirt dy nit halden, der sal an alle genad in dy czech geben ein czentner wax.
Item, welcher mayster myth eynem anderen mayster eyn leg, der do nycht yn der czech wer, der yst vorfallen wax floren 1.¹⁾

Item, welcher mayster der do kawft ayn forfawlt duch, der sal ferfallen in dy zech aynen centen wox wnd das klat dar zwar.
Item, welcher mayster der do zaygt auff dy dorffer zu arbayten, edellayten aber anderen, der soll ferwallen eynen centen wax.²⁾


1) Artikel (ab item) von anderer Hand mit anderer Tinte hinzugefügt. [3x]^{^}
2) Beide Artikel später, nach Vlaicu um 1504, hinzugefügt. Danach folgt ein weiterer, mit Jahreszahl 1519 datierter Nachtrag.^{^}