Urkunde Nr. 681 aus Band II

Seite im UB:

100-101 ^a)

Heute in:

Karlsburg (Weissenburg), Batthyaneum [Biblioteca Naţională a României, Filiala Biblioteca documentară Batthyaneum, Alba Iulia]

Druckvorlage:

nach Original

Abdruck als:

Volltext

Sprache:

Latein

---

681

Kerz 1353 September 1 Abt Marsilius und der Konvent von Kerz bezeugen, dass Cunradus, Pfarrer in Klosdorf, gegen den Priester Johannes als Eindringling in seine Pfarre an den siebenbürgischen Bischof berufen habe.

Nos frater Marsilius abbas in Kercz totusque conventus ibidem ordinis Cysterciensis Strigoniensis diocesis notum facimus universis tenorem praesentium inspecturis, quod honestus vir dominus Cunradus sacerdos et rector ecclesiae in villa Nicolai ad nostram accedens praesentiam propria in persona quandam appellationem in charta scriptam coram nobis legit in haec verba. In nomine domini amen. Ego Cunradus sacerdos et rector ecclesiae in villa Nycolai mea in persona coram vobis religiosis viris videlicet domino Marsilio abbate et fratribus de conventu claustri sanctae Mariae virginis in Kercz dico et propono, quod cum ego ecclesiam videlicet sancti Nycolai in villa Nycolai iam multis diebus possederim pacifice et quiete, inquam non aliunde ascendendo sed per verum ostium¹⁾ intrando hoc est auctoritate domini Andreae dei et apostolica gratia episcopi Transiluani confirmatus rite et rationabiliter vel sui veri nuncii videlicet magistri Mychaelis archidiaconi de Doboca. Qui quidem magister Mychael non frustratam auctoritatem mediantibus literis ipsius domini episcopi habebat sed plenam auctoritatem citandi, interdicendi, excommunicandi, absolvendi, deponendi, instituendi, visitandi et excessus corrigendi, sicut in literis ipsius domini episcopi continetur. Nunc vero timeo me gravari per discretos viros videlicet per dominum Petrum plebanum de Appoldya et decanum in Kyzd et dominum Johannem plebanum de Dalya maiori. Qui quidem domini conantur quendam alium sacerdotem nomine Johannem in dictam meam ecclesiam locare et me omnino alienare propter quasdam literas mandati eiusdem domini episcopi, cum tamen idem Johannes sacerdos secundum formam iuris exstitit amotus et alienatus ab ecclesia ante dicta. Item dico et propono, quod idem dominus Johannes sacerdos propter suam rebellionem et contumaciam exstitit citatus, ammonitus, interdictus et excommunicatus per eundem magistrum Mychaelem archidiaconum auctoritatem ipsius domini episcopi habentem. Et quia non curabat interdictum seu excommunicationem sed medio tempore celebrabat missarum solennia et post sententiam illatam, et propter hoc incidit in laqueum irregularitatis. Item dico et propono, quod cum idem Johannes sacerdos residentiam haberet in villa Nycolai, manifeste et publice vinum propinabat et tabernas exercebat in sacra dote ecclesiae. Item dico et propono, quod praedictus Johannes sacerdos mani- [S. 101] festus concubinarius exstitit et columtator. Item dico et propono, quod ipse anno plus quam praeterito per totam quadragesimam ab ecclesia illa se absentavit propter suam avaritiam alias recipiens confessionem commissum sibi populum negligendo ita, quod medio tempore tres pueri sine sacramento baptismatis moriebantur. Item dico et propono, quod saepe dictus Johannes praeter hos excessus notorios propositos et proponendos iniuste et false exstitit confessus domino episcopo, pro quo iuste et debite fuit depositus et privatus officio praenotato. Unde propter huiusmodi excessus dominus episcopus iussit eundem Johannem sacerdotem bina vice carceri mancipari. Idcirco quia me sentio gravari iniuste et indebite contra eundem dominum Petrum plebanum de Apoldia et decanum de Kyzd et dominum Johannem de Dalya maiori et contra praedictum Johannem sacerdotem excipio et appello et iterum excipio et appello ad faciem seu sedem domini episcopi Andreae Transiluani, et apostolos peto et instanter peto et instantissime peto, et omnia praedicta me offerens probaturum loco et tempore opportuno absque tamen vitio diminutionis vel additionis, subiiciens nihilominus me et omnia bona mea et ecclesiam meam protectioni ipsius domini mei episcopi et suae sedis praenotatae, terminum autem meae exceptionis seu appellationis praefigo a iure¹⁾ deputatum ad sanetam congregationem synodalem. Justis igitur postulationibus inclinati praesentem paginam ad instantiam saepe dicti domini Cunradi plebani in villa praedicta Nycolai nostrorum sigillorum videlicet abbatis et conventus ante dicti fecimus appensione muniri. Datum in Kercz, anno domini M^o. C^o C^o C^o LIII^o, in die sancti Egidii abbatis et confessoris.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1 auf S. 100, 1 auf S. 101.^{^}
[S. 100]
1) Vorlage: hostium.^{^}
[S. 101]
1) Szeredai a. a. O.: me.^{^}