Urkunde Nr. 840 aus Band II

Seite im UB:

235

Heute in:

Budapest, Ungarisches Landesarchiv [Magyar Országos Levéltár]

Druckvorlage:

nach Original

Abdruck als:

Volltext

Sprache:

Latein

---

840

Weissenburg 1366 April 24 König Ludwig I. erlässt eine Verordnung zu Gunsten der grundherrlichen Gerichtsbarkeit des Magisters Johann von Malmkrog.

Lodouicus dei gratia rex Hungariae fidelibus suis universis praelatis baronibus, comitibus, castellanis, nobilibus, officialibus et aliis cuiusvis dignitatis et status hominibus, item civitatibus et liberis villis, ipsarumque rectoribus iudicibus et villicis quibus praesentes ostendentur salutem et gratiam. Cum antiqua et approbata regni nostri consuetudine requirente quilibet nobilis et homo possessionatus suos iobagiones et famulos impossessionatos in causis quibuslibet exceptis duntaxat furtis, publicis latrociniis et causis criminalibus ipsemet habeat iudicandi facultatem, fidelitati vestrae universitatis firmo regio sub edicto mandamus, quatenus deinceps iobagiones magistri Johannis filii Gegus de Almakerek et famulos eiusdem impossessionatos in suis possessionibus more iobagionum residentes in causis aliquibus, exceptis tribus articulis praetactis, in tenutis et possessionibus vestris ac vestri in medio ad alicuius instantiam iudicare vel vestro iudicatui astare compellere, aut ipsos et eorum res ac bona arestare et impedire seu arestari et impediri facere et permittere nullatenus praesumatis, sed dimittatis eosdem cum rebus et bonis eorum quibuscumque procedere ubilibet pacifice et sine impedimento aliquali. Si qui autem aliquid actionis vel quaestionis contra ipsos iobagiones et famulos impossessionatos dicti magistri Johannis habent vel habuerint, hoc in praesentia ipsius magistri Johannis vel suorum officialium in possessionibus suis exequantur iuris ordine et regni nostri consuetudine requirente. Si vero idem magister Johannes et sui officiales in facienda iustitia cuipiam recusantes fuerint, tum ipse magister Johannes per querelantes in nostram vel ordinarii sui iudicis praesentiam legitime evocetur rationem abnegatae iustitiae redditurus, ubi ex parte eiusdem iuris et satisfactionis querelantibus exhibebitur complementum omni dilatione postergata. Datum in Albae Julae, in festo beati Georgii martyris, anno millesimo CCC^mo LX^{mo a)} sexto.

Unter dem Siegel: Generalis commissio regis consueta. [S. 236]


a) Die hochgestellten Buchstaben nach den Zahlzeichen sind in diesem Band des gedruckten Urkundenbuches differenziert gesetzt, hier über dem Zahlzeichen, letztes nach dem Zahlzeichen nichthoch mit Abkürzungsstrich.^{^}