Urkunde Nr. 1007 aus Band II

Seite im UB:

404-405

Heute in:

Vatikanstadt, Vatikanisches Archiv [Archivum Secretum Apostolicum Vaticanum, Archivio Segreto Vaticano]

Druckvorlage:

nach anderem Urkundenbuch mit Quellennachweis

Abdruck als:

Volltext

Sprache:

Latein

---

1007

Avignon [1373] Mai 16 Papst Gregor XI. ernennt den Hermannstädter Propst Paul zum Bischof von Knin.

Gregorius episcopus et cetera dilecto filio Paulo electo Tiniensi salutem et cetera. Apostolatus officium et cetera. Sane ecclesia Tiniensi ex eo vacante, quod nos hodie venerabilem fratrem nostrum Nicolaum Cenadiensem tunc [S. 405] Tiniensem episcopum licet absentem a vinculo, quo ipsi ecclesiae Tiniensi, cui tunc praeerat, tenebatur, de fratrum nostrorum consilio et apostolicae potestatis plenitudine absolventes, ipsum ad ecclesiam Cenadiensem tunc pastore carentem auctoritate apostolica duximus transferendum praeficiendo ipsum dictae Cenadiensi ecclesiae in episcopum et pastorem, nos ad provisionem ipsius ecclesiae Tiniensis celerem et felicem, ne longae vacationis detrimenta subiret, paternis et sollicitis studiis intendentes post deliberationem, quam de praeficiendo eidem Tiniensi ecclesiae personam utilem et etiam fructuosam cum fratribus nostris habuimus diligentem, demum ad te praepositum ecclesiae Ciiniensis Transilvanensis diocesis in sacerdotio constitutum, cui de literarum scientia, vitae munditia, honestate morum, spiritualium providentia et temporalium circumspectione et aliis multiplicium virtutum donis apud nos fide digna testimonia perhibentur, direximus oculos nostrae mentis. Quibus omnibus debita meditatione pensatis de persona tua nobis et eisdem fratribus nostris ob dictorum tuorum exigentiam meritorum accepta eidem Tiniensi ecclesiae de ipsorum fratrum consilio auctoritate apostolica providemus, teque illi praeficimus in episcopum et pastorem, curam et administrationem ipsius ecclesiae Tiniensis tibi in spiritualibus et temporalibus plenarie committendo in illo, qui dat gratias et largitur praemia, confidentes, quod dicta Tiniensis ecclesia sub tuo felici regimine gratia tibi assistente divina prospere dirigetur et salubria dante domino in eisdem spiritualibus et temporalibus suscipiet incrementa. Quocirca discretioni tuae per apostolica scripta mandamus, quatenus impositum tibi a domino onus regiminis dictae Tiniensis ecclesiae suscipiens reverenter sic te in eius cura salubriter exercenda diligentem exhibeas et etiam fructuosum, quod ecclesia ipsa gubernatori provido et fructuoso administratori gaudeat se commissam, tuque praeter aeternae retributionis praemium nostram et apostolicae sedis benedictionem et gratiam exinde uberius consequi merearis. Datum Avinione, XVII. Kalendas Junii, pontificatus nostri anno tertio.
In eodem modo venerabili fratri . . ¹⁾ Archiepiscopo Spalatensi, dilectis filiis capitulo et universis vasallis ecclesiae Tiniensis, clero et populo civitatis et diocesis Tiniensis, necnon carissimo in Christo filio Ludovico regi Ungariae illustri.


1) Hugolinus.^{^}