Urkunde Nr. 1081 aus Band II

Seite im UB:

476-477

Druckvorlage:

nach Original

Abdruck als:

Volltext

Sprache:

Latein

---

1081

Kaschau 1377 Juni 28 König Ludwig I. bestätigt für Nikolaus und Ladislaus, die Söhne Stephans von Toroczko, die durch Margaretha, Wittwe nach Peter von Johannisdorf, und Genossen gemachte Schenkung, betreffend die Besitzung Reussdorf und eine Vinea in Gugendorf.

Nos Lodouicus dei gratia rex Hungariae, Poloniae, Dalmaciae et cetera memoriae commendantes tenore praesentium significamus quibus expedit universis, quod Nicolaus et Ladislaus filii Stephani de Torozko ad nostrae maiestatis veniendo praesentiam nobis significare curarunt, quod nobilis domina Margareta vocata relicta Petri filii Georgii de Zenth Iuan soror eorum uterina ob amorem fraternalis dilectionis quandam possessionem suam Kund vocatam in comitatu de Kykulleu existentem sibi per Ladislaum filium Ladislai de Zarkad specialem hominem viri magnifici domini Ladislai vaivodae nostri Transiluani sub testimonio conventus ecclesiae beatae virginis de Clusmunustura volente et consentiente Ladislao filio Emerici de Ebesfolua fratre ut puta ipsius Petri patruele pro dote et rebus suis paraphernalibus ac scrinialibus, ut in literis dicti conventus exinde confectis luculenter contineri vidimus, in festo beati Lucae evangelistae nunc praeterito¹⁾ nemine contradictore apparente legitime statutam cum omnibus²⁾ suis utilitatibus et pertinentiis universis, item iam dictus Ladislaus filius Emerici zelo ductus proximitatis quandam vineam suam quinque iugera continentem in territorio possessionis suae Goganfolua vocatae in facie videlicet cuiusdam terrae Tamastelke appellatae sitam similiter cum omnibus suis utilitatibus ad ipsa quinque iugera vinearum spectantibus vigore aliarum literarum dicti conventus in specie nobis exhibitarum perpetuo et irrevocabiliter donavissent possidendas, tenendas et habendas, supplicantes exinde nostrae maiestati humiliter et devote, ut praemissam donationem eisdem in dicta possessione Kund et eadem vinea per ipsos Ladislaum filium Emerici et nobilem dominam sororem eorum praemisso modo factam ratam habendo et acceptam eidem³⁾ donationi nostrum regium [S. 477] consensum adhibere dignaremur et assensum. Nos igitur supplicationibus eorundem filiorum Stephani humillimis benignitate regia inclinati consideratis nihilominus fidelitatibus et fidelium servitiorum praeclaris meritis eorundem, quibus ipsi semper nostrae studuerunt complacere maiestati, praemissam donationem ipsorum Ladislai filii Emerici et nobilis dominae sororis eorum ipsis filiis Stephani et eorum heredibus in perpetuo valere confirmantes patrocinio praesentium mediante salvis iuribus alienis. Praesentes autem in formam nostri privilegii redigi faciemus, dum nobis fuerint reportatae. Datum Cassouiae, die dominico proximo ante festum beatorum Petri et Pauli apostolorum, anno domini M^o CCC^mo LXX^mo septimo.


a) Nachtrag UB II 757.^{^}

1) 1376 Oktober 18. ^{^}
2) Vorlage: omibus.^{^}
3) Vorlage: eidm.^{^}