Urkunde Nr. 1717 aus Band III

Seite im UB:

572-574

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U.II, Nr. 16.

Druckvorlage:

nach Original

Abdruck als:

Volltext

Sprache:

Latein

---

1717

Ofen 1413 Juli 18 Königin Barbara erlässt zu Gunsten der sieben Stühle eine Verordnung, betreffend die den Sachsen im ganzen Reiche zustehende Freiheit von Abgaben.

[S. 573] Von der Kanzlei: Relatio Stiborii vaivodae Transsiluani.

Barbara dei gratia Romanorum ac Hungariae et cetera regina fidelibus nostris universis et singulis praelatis, baronibus, comitibus, castellanis, nobilibus eorumque officialibus, item civitatibus et liberis villis ipsarumque rectoribus iudicibus et villicis necnon tributariis tricesimatoribus¹⁾ tam regalibus quam nostris reginalibus et aliorum quorumcumque intra ambitum regni nostri tam in terris quam super aquis ubilibet constitutis et constituendis praesentium notitiam habituris salutem et gratiam. Ex querulosa significatione fidelium nostrorum providorum et circumspectorum virorum Jacobi filii magistri civium de Cibinio necnon Michaelis dicti Hon de Segeswar et Petri dicti Buzar, civium nostrarum civitatum praedictarum per eosdem in ipsorum ac universorum civium et hospitum de eisdem item singulorum Saxonum septem sedium partium nostrarum Transsiluanarum personis nobis facta nostra valde displicenter intellexit serenitas, quod licet universos Saxones ipsorum scilicet praedecessores quondam illustris princeps dominus Andreas dictorum regnorum Hungariae, Dalmaciae et cetera rex felicis recordationis suis literis mediantibus in anno domini millesimo ducentesimo vigesimo quarto²⁾ confectis et emanatis ubique in regno nostro Hungariae praedicto a solutione cuiuslibet tributi ex gratia sua speciali exemerit, ipsas quoque literas ipsius Andreae regis alii reges praescripti regni Hungariae eiusdem scilicet Andreae regis successores nostrique praedecessores confirmaverint, immo ut dicitur dominus Sigismundus rex contoralis noster carissimus confirmasser, iidemque cives et³⁾ hospites³⁾ ac Saxones de rebus et bonis ipsorum a tempore praefixo hucusque in nullis tributomm locis tributum solverint, sed ipsi et eorum quilibet praemissa libertate et exemptione semper et omni tempore freti fuissent et gavisi, vos tamen contra huiusmodi ipsorum iura ac libertates et gratiarum praerogativas ab ipsis et eorum rebus ac bonis in dictis tributorum locis tributum recepissetis recipereque praetenderetis⁴⁾ in futurum. Supplicarunt itaque praefati Jacobus, Michael et Petrus ipsorum ac aliorum quorum supra nominibus maiestati nostrae humiliter et devote, ut ipsis superinde de condigno remedio providere dignaremur et opportuno. Verum quia nos dictum tributum a praetactis civibus hospitibusque et Saxonibus contra praescriptas eorum libertates per vos recipere non velimus modo aliquali, ideo fidelitati vestrae firmissime praecipimus et mandamus, quatenus a modo in posterum contra libertates et gratiarum praerogativas dictorum civium et hospitum necnon ceterorum Saxonum super eosdem vel alterum ipsorum nullum tributum seu aliquam tributariam exactionem exigere et recipi facere ullatenus praesumatis nec sitis ausi modo aliquali. Secus non facturi. Alioquin commisimus et serie praesentium committimus comitibus illorum comitatuum, in quo vel in quibus huiusmodi mandatorum nostrorum transgressores reperirentur, ut ipsi vos vel eorum alter comperta [S. 574] prius praemissorum veritate ad praemissa facienda visis libertatibus et gratiarum praerogativis eorundem civium et Saxonum compellant et astringant aequitate suadente. Praesentes quoque post lecturam semper reddi edicimus praesentanti. Datum Budae, feria tertia proxima post festum divisionis apostolorum, anno domini millesimo quadringentesimo tredecimo.


1) Vorlage: trecesimatoribus.^{^}
2) Vergleiche Nr. »43. ^{^}
3) So zweites Orig. -- Fehlt in der Vorlage. [2x]^{^}
4) Vorlage: praedenderetis.^{^}