Urkunde Nr. 1337 aus Band III

Seite im UB:

123-124 ^a)

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Heutige Signatur:

Fond 1: Stadt Kronstadt [Primaria Municipiului Braşov], Privilegiensammlung (Colecţia privilegii) Nr. 17.

Druckvorlage:

nach Original

Abdruck als:

Volltext

Sprache:

Latein

---

1337

1395 Februar 18 König Sigmund verfügt zu Gunsten des Distriktes Kronstadt, dass die Leute dieses Distriktes nur vor dem Richter und Rat von Kronstadt gerichtlich belangt werden dürfen, ausgenommen die Fälle von Diebstahl, Raub und sonstigen Publica criminalia, dass ferner die Weiterklage nur gegen den Richter und Rat zu führen und an den Comes der Szekler zu leiten ist.

Von der Kanzlei: Propria commissio domini nostri regis.

[S]igismundus¹⁾ dei gratia Hungariae, Dalmaciae, Croaciae, Ramae, Seruiae, Galliciae, Lodomeriae, Comaniae Bulgariaeque rex ac marchio Brandemburgensis, sacri Romani imperii archicamararius necnon Bohemiae et Lucemburgensis heres omnibus Christi fidelibus praesentibus et futuris praesentium notitiam habituris salutem in salutis largitore. Regiae dignitati convenit nationes sibi subiectas in viam pacis et iustitiae dirigere commodisque et utilitatibus eorundem providere, ut eaedem sicuti numero sic et fidelitate augeantur. Proinde ad universorum tam praesentium quam futurorum notitiam tenore praesentium volumus pervenire,²⁾ quod fideles nostri iudex, iurati consules seniores et universi cives civitatis nostrae Brassouiensis suis et aliorum fidelium incolarum nostrorum in villis ad eandem sedem Brassouiensem spectantibus commorantium in personis in nostrae celsitudinis venientes conspectum nostrae dolorose significarunt maiestati, quod cum ipsi simul vel divisim ad provincias aut aliqua regni nostri climata in acquisitione victuum suorum necessariorum aut alia necessitate compulsi proficiscerentur, per nonnullos praelatos, barones, comites, castel- [S. 124] lanos, nobiles et alterius status homines in personis ipsorum iudicarentur et impedirentur in rebusque et mercibus ipsorum damnificarentur,¹⁾ arestarentur et prohiberentur incessanter signanter pro debitis, delictis et offensis aliorum, deprecantes per nostram maiestatem super his condignum et opportunum remedium ipsis elargiri. Nos igitur nostri regii regiminis officio incumbente volentes nobis subiectos in viam pacis et iustitiae dirigere et in pacis pulchritudine et quietis tranquillitate conservare, nolentes ipsos fideles cives et hospites nostros in eorum processibus²⁾ per quempiam impediri et damnificari³⁾ fidelibus nostris universis praelatis, baronibus, comitibus, castellanis, nobilibus, officialibus item civitatibus et liberis villis ipsarumque rectoribus iudicibus et villicis praesentibus et futuris praesentium continentiam visuris et audituris firmissimo praecipimus regio sub edicto omnino volentes, quatenus ipsi⁴⁾ a modo in antea praefatos cives et hospites nostros Brassouienses et ad eandem pertinentes aut eorum familiares in ipsorum possessionibus, tenutis, honoribus, officiolatibus ac eorum medio in nullis causis et causarum articulis exceptis duntaxat furti, latrocinii et aliis publicis criminalibus in personis iudicare, impedire et offendere ac in rebus et mercibus ipsorum arestare, damnificare, prohibere aut facere prohiberi nullatenus praesumant nec sint ausi modo aliquali praesertim pro debitis, offensis et excessibus aliorum. Sed si qui ex ipsis quidquam actionis vel quaestionis contra annotatos cives et hospites nostros ac familiares ipsorum habent vel habuerint, id legitime in praesentia iudicis et iuratorum dictae civitatis nostrae Brassouiensis⁵⁾ exequantur, ex parte quorum iidem iudex et iurati cuilibet querulanti meri iuris et iustitiae exhibere tenebuntur complementum, prout dictaverit ordo iuris. Et si iidem iudex et iurati cives nostri in reddenda cuipiam iustitia tepidi fuerint vel remissi, ex tunc non hi contra quos agitur sed praefati iudex et iurati cives dictae civitatis nostrae Brassouiensis in praesentiam comitis Siculorum nostrorum videlicet comitis ipsorum civium et hospitum nostrorum ordinarii per querulantes legitime evocentur rationem abnegatae iustitiae reddituri et condignum iudicium recepturi dictante iuris aequitate. Aliud sub nostrae indignationis poena facere non audentes praesentium per vigorem. In cuius rei memoriam firmitatemque perpetuam praesentes concessimus literas nostras privilegiales pendentis et authentici sigilli nostri duplicis munimine roboratas. Datum per manus reverendissimi in Christo patris et domini, domini Johannis archiepiscopi ecclesiae Strigoniensis locique eiusdem comitis perpetui primatisque et apostolicae sedis legati ac aulae nostrae et reginalis maiestatum eximii cancellarii dilecti nostri et fidelis, anno domini M^mo CCC^mo nonagesimo quinto, duodecimo Kalendas mensis Marcii, regni autem nostri anno octavo. [S. 125]

<re>Von der Kanzlei: Propria commissio domini nostri regis. </re>


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1-2 auf S. 123, 1-5 auf S. 124.^{^}
[S. 123]
1) Raum für S leer gelassen.^{^}
2) Über der Zeile nachgetragen.^{^}
[S. 124]
1) Vorlage: dapnificarentur.^{^}
2) Vorlage: proscessibus.^{^}
3) Vorlage: dapnificari.^{^}
4) Über der Zeile nachgetragen.^{^}
5) Hierauf nochmals: Brassouiensis.^{^}