Urkunde Nr. 4508 aus Band VII

Seite im UB:

327-328

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. III (Inventar 27), Nr. 143.

Druckvorlage:

nach Original

Abdruck als:

Volltext

Sprache:

Latein

---

4508

Vor Hainburg 1482 Oktober 3 König Matthias beauftragt die Sachsen der Sieben und Zwei Stühle und des Burzenlandes, die Abgabe von 12000 Goldgulden ohne weiteres Hinausziehen abzuführen.

Von der Kanzlei: Commissio propria domini regis.

Mathias dei gratia rex Hungariae, Bohemiae et cetera fidelibus nostris prudentibus et circumspectis septem et duarum sedium Saxonicalium Saxonibus et terrae Barcza salutem gratiam. Ex intimatis fidelis nostri dilecti reverendi domini Urbani electi et confirmati ecclesiae Iauriensis, thesaurarii nostri, intelleximus magna displicentia, qualiter vos illam summam duodecim milium florenorum auri, quam vos daturi obtuleratis ex aliquorum de medio vestri persuasionibus retractassetis et ipsam summam modis omnibus reddere [S. 328] prorogassetis allegantes, qualiter exercituari necessario deberetis. Solum fideles nostri Cibinienses in hac parte maiestati nostrae se obtemperassent. Unde minime constat nobis exercituatio vestra, quam facere dicitis, cum inimici nostri contra quos vos exercituari debuissetis nunc volente altissimo prostrati undique subiaceant et non cogitatis negotium nostrum per hoc turbari. Mandamus idcirco fidelitati vestrae harum serie firmissime, quatenus omni excusatione solita praetermissa huiusmodi summam duodecim milium florenorum auri absque omni mora disponere et recolligere et per hunc hominem nostrum praesentium ostensorem eidem thesaurario nostro dirigere debeatis, aut tu magister civium civitatis nostrae Cibiniensis praedictae personaliter portare studeas, quoniam aliunde etiam intelleximus, quod per te plus quam per alios negotium istud adversatum fuisset, quod suo tempore requirere non obmittemus. Aliud sub gravi indignatione nostra millo modo facturi. Datum in castris nostris sub civitate nostra Hainburg sub sigillo nostro annulari secreto in profesto beati Francisci confessoris, anno domini millesimo quadringentesimo octogesimo secundo, regnorum nostrorum anno Hungariae et cetera vicesimo quinto, Bohemiae vero quarto decimo.