Urkunde Nr. 4664 aus Band VII

Seite im UB:

451-452

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Kapitel Hermannstadt [Capitlul evanghelic CA Sibiu] (Inventar 298), Urkunden Nr. 37 und 38.

Druckvorlage:

nach Original

Abdruck als:

Volltext

Sprache:

Latein

---

4664

(Vor 1486 September 16) Die Pfarrer Michael von Heltau und Michael von Rothberg protestieren gegen einen Auftrag, der von einer ausserhalb ihres Jurisdiktionsbereichs stehenden Instanz ergangen ist.

Reverendissime in Christo pater et domine gratiosissime. Michael artium liberalium magister de Helta¹⁾ et alter Michael de Ruffomonte ecclesiarum plebani in ipsorum ac venerabilium dominorum Petri artium et decretorum doctoris plebani de Stolczenburg et decani capituli Cibiniensis et Johannis Dewr artium et decretorum baccalaurei plebani Cibiniensis aliorumque om- [S. 452] nium plebanorum dicti decanatus Cibiniensis praemissa protestanione, quod coram iudice sed tamquam reverendissima persona nec volunt consentire in iurisdictionem vestrae reverendissimae dominationis nisi prout et in quantum de iure debebunt et tenebuntur. Hacque protestatione semper salva dicunt decano nec non universis habitatoribus et incolis dicti decanatus a sede apostolica fuisse et esse gratiose concessum, ut nullus ex eis praesentibus et futuris vigore sive praetextu quarumcumque citationum, inhibitionum et monitoriarum vel aliarum. eiusdem sedis literarum vel legatarum²⁾ eius quomodolibet obtentorum extra limites, dicti decanatus in quibuscumque causis actionibus et querelis in prima instantia quomodolibet in causam trahi possint sed causae ipsae infra praemissos limites vel in dioecesi Strigoniensi audiri, terminari et decidi debeant. Vestra autem reverendissima dominatio nuper literas monitorias cum interdicti et suspensionis sententiis contra dictos decanum et plebanos decrevit et emisit, quarum vigore et praetextu in quadam causa ecclesiae suae Albensis Transsilvanae quae propria eiusdem vestrae reverendissimae dominationis esse censetur, eiusdem decanum et plebanos ad instantiam venerabilium dominorum Gregorii cantoris et Michaelis custodis eiusdem ecclesiae suae extra praefatos limites contra praescriptam concessionem apostolicam trahere intendit. Et quia dicta sedes apostolica omnes et singulas apostolicas ac citationis, monitionis, inhibitionis et alias literas quascumque nec non processus interlocutorias diffinitivas excommunicationis, suspensionis et interdicti aliasque ecclesiasticas sententias censuras et poenas quas in contrarium impetrari seu ferri et promulgari nec non totum id et quicquid contra promissa vel eorum aliquod fieri vel attentari contingeret nullius subsistere roboris firmitatis decrevit et etiam declaravit. Quapropter reverendissime domine literae vestrae reverendissimae dominationis contra huiusmodi concessionem apostolicam ut praemittitur decretae et emissae nec non censurae sive sententiae in eisdem latae et promulgatae nullius sunt firmitatis aliasque sunt tales quod ipsos dominos decanum et plebanos non artant eorumque praetextu ipsi domini decanus et plebani ex praemissae concessione apostolica coram vestra reverendissima dominatione comparere non tenentur. Petunt igitur dicti uterque Michael plebani in personis quorum supra semper³⁾ vestram reverendissimam dominationem a sua praesentia dimitti et praefatos dominos Gregorium cantorem et Michaelem custodem impetratores dictarum literarum vestrae reverendissimae dominationis ut iuris est in expensas condempnari et cetera praemissam autem concessionem si et in quantum opus est salva dicta protestatione iisdem uterque Michael plebani parati sunt probare et offerunt se nunc probaturi⁴⁾.

Salvo iure addendo et cetera.


1) 2. Exemplar Heltha. ^{^}
2) 2. Exemplar legatorum.^{^}
3) 2. Exemplar seu.^{^}
4) 2. Exemplar probari. ^{^}