Urkunde Nr. 4751 aus Band VIII

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

4751

Kronstadt 1487 Dezember 4 Der Rat von Kronstadt sowie die Richter und Ältesten des Burzenlandes entscheiden den Streit um die Errichtung eines Fischteiches zwischen den Gemeinden Neustadt und Rosenau zu Gunsten der Neustädter.

Nos iudex et iurati cives civitatis Braschouiensis necnon iurati iudices et seniores terrae Barczensis memoriae commendamus tenore paesentium universis et singulis quibus expedit significare, quod cum nos pariter in consistorio nostro secundum consuetudinem nostram pro iudicandis causis consedissemus, accessit nostram praesentiam¹⁾ honorabilis dominus Laurentius, plebanus in villa Newstat, cum villico Cristianno et ceteris iuratis senioribus de eadem proposueruntque nobis quaerulose, quomodo discreti viri iudex et iurati seniores cum tota communitate de Rosnaw fecissent unam novam piscinam in fossatum et fluvium aquae, in quo aqua ab antiquis temporibus in dictam villam Newstat meatum habuisset, etiam a tanto tempore, quod non est in memoria hominum, aliud habuisse fossatum seu fluxum pro subsidio et nutrimento incolarum inibi et ipsorum iumentorum atque pecudum, et modo propter praedictam piscinam magnam penuriam et dampnum fuissent passi propter defectum quae ipsis non advenisset, quemadmodum ante praeparationem praetactae piscinae, probantes illud sufficienti testimonio cum nonnullis discretis viris de civitate Brascho, Rosnaq, Vulkan, Vydenbach et aliis partibus, qui praedictam carentiam vidissent maxime in hyeme et duobus annis, quibus scribebatur 1484²⁾ et quinto, petentes nos humillimis precibus ut ipsis de remedio providere dignaremur, ne maiora dampna in futurum perciperentur³⁾ praecipue propter periculum ignis. Econtra praefati iudex Matheus cum ceteris iuratis senioribus de Rosnaw reponderunt, quod praetactam piscinam in metas et athar proprium praeparassent, in quibus sperarent, se habere iustitiam; insuper vellent disponere et praeparare alium fossatum et aquae fluxum in dictam villam Newstat, unde nullam paterentur carentiam habuimus sed semper copiam et sufficientiam. Unde pro maiori cautione et providentia misimus duos iuratos cives de civitate Brascho, videlicet Nicolaum Schobel et Melchior Seratorem et iuratos iudices Valentinum Kletner de Foeldwar et Michaelem Fey⁴⁾. de Prasmar, ut ascenderent et conspicerent, si per alium fossatum aquam sufficientem habere possint in dicta Newstat. Qui cum reversi venissent dixerunt nobis quod dubiosum et timendum esset. Nos itaque habita diligentia secundum nostram possibilitatem, deum et iustitiam prae oculis statuentes, talem tulimus sententiam: Ex quo inter duo dampna maius dampnum est vitandum et praecavendum, et inter duo bona maius bonum est eligendum et praeservandum, quod ipsi homines de Rosnaw deberent aquam mittere fluere in antiquo fossato in quo fluxit ab antiquis temporibus sic quod non est in memoria hominum ipsam aquam per aliud fossatum in dictam villam Newstat fluxisse et unde semper copiam de aqua habuerunt et maxime propter periculum ignis, unde intollerabilia dampna percipere possunt propter defectum et carentiam aquae. Sed si praefati homines de Rosnaw piscinas velint aedificare, aedificent illas in huiusmodi locis unde alii dampnum et penuriam aquae non patiantur. In cuius evidentiam atque testimonium praesentes litteras sigillo nostro provinciali consignatas duximus concedendas. Datum Braschouiae in die sanctae Barbarae virginis ac martiris, anno domini millesimo quadringentesimo octuagesimo septimo et cetera.


1) Vorlage praesentis.^{^}
2) So Vorlage.^{^}
3) Vorlage percipentur.^{^}
4) Könnte auch Sey gelesen werden.^{^}