Urkunde Nr. 268 aus Band I

Seite im UB:

197-198 ^a)

Heute in:

Klausenburg, Filiale des Erzbischöflichen Archivs [Arhiva Arhidiecezei Romano Catolice de Alba Iulia si arhiva statusului Romano Catolic din Transilvania, Filiala Cluj]

Druckvorlage:

nach Einschaltung (Insert)

Abdruck als:

Volltext

Sprache:

Latein

---

268

Weissenburg 1295 April 6 Der siebenbürgische Bischof Petrus bestimmt Rechte und Pflichten der Deutschen von Sard . [S. 198]

Nos Petrus miseratione divina episcopus Transsiluanus significamus quibus expedit universis praesentium per tenorem, quod populis nostris de villa Sard hanc contulimus libertatem, ut in festo beati Martini omnes communiter singulis annis tredecim marcas terrestres argenti pro terragio¹⁾ solvere teneantur. Item quicumque ex ipsis hospitibus nostris in ipsa villa Sard et terra aliqua aedificia vel vineas aut alia quaecumque opera fecerint, libere possint vendere vel donare in vita vel in morte cuicumque voluerint, aut etiam recedentes et sicut libere veniunt, sic libere recedant quandocumque voluerint iusto terragio¹⁾ villico eorum pro tempore constituto persoluto. Hanc etiam gratiam eis duximus faciendam, ut quicumque ex ipsis sine herede decederet, omnia bona sua cuicumque voluerit, in morte sua libere possit relinquere, legare seu donare uno bove trienne nobis dato. Ceterum pro descensu nostro semel in anno unum bovem pascualem et unum porcum ac unam tunellam vini de tota villa, de singulis etiam mansionibus unam gallinam, unum cubulum avenae et duos panes dare debent.Item minutas causas inter ipsos exortas villicus ipsorum iudicabit, maiores autem causas, sicut super effusione sanguinis, morte, furto et similibus comes eorum cum villico iudicabit. Quorum quidem iudiciorum duae partes cedent comiti, tertia parte villico remanente eorundem. Super vulneribus autem inferendis et illatis, secundum vulneris illati qualitatem et quantitatem, utrum scilicet maior vel minor debeat reputari laesio et per quem scilicet iudicem vel villicum de huiusmodi laesione decernatur, modum et consuetudinem Cybinyensem eisdem volumus facere observari. Ad haec indulsimus eisdem, ut si iudex ipsorum pro tempore constitutus in exigendis iudiciis seu aliis gravaminibus inferendis se redderet pertinacem et severum, in quo et in quibus libertas ipsorum populorum nostrorum infringi videretur, absque iudicii gravamine seu cuiusvis timore poenae non obstante possunt iidem populi nostri iudicem suum, donec super ipso negotio nos consulant, prohibere. In cuius rei testimonium et perpetuam firmitatem praesentes concessimus literas sigilli nostri munimine roboratas. Datum Albae, quarto die resurrectionis domini, anno domini M^mo CC^mo nonagesimo quinto.


a) Seitenumbruch nach Kopfregest.^{^}

1) Vorlage: terradio. [2x]^{^}