Urkunde Nr. 2342 aus Band V

Seite im UB:

28-30

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25), Nr. 96.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

2342

Hermannstadt 1439 Juni 28 Michael, Abt von Kerz, verzichtet auf seine Würde und die damit verbundenen Einkünfte und Rechte zu Gunsten des Johannes von Bornequel.

Venerabiles patres et domini vos omnes et singulos quotquot hic estis communiter et divisim in testimonium praesentis actus invocando nos Michael abbas monasterii in Kercz dicimus, quod licet nos fuerimus in dicto monasterio Kercz ordinis Cisterciensis per annos decem prior et postea rite legitime et canonice iuxta apostolica et praefati nostri ordinis sacra instituta in abbatem promoti et plus quam viginti quatuor annis ibidem ut abbas et praelatus praefuerimus et tanto tempore ac per tantum tempus diligentiam nobis possibilem in eis quae nostris habuerimus, quae ratione nostrae dignitatis incumbebant, iuxta posse fecerimus, tamen ultra praemissa infinitas et a Turcis et a Walachis ac aliis crucis Christi inimicis immo quod peius est a propiis dicti monasterii subditis et iobagionibus, qui in mortem et interitum personae nostrae machinati sunt multas et varias passi sumus iniurias et immanes persecutiones. Ita quod tempore nostri regiminis proh dolor dictum monasterium nostrum pluribus vicibus fuerat combustum et desolatum et nos semper dei auxilio adiuti vires recuperantes illud reaedificavimus et reformavimus iugiter in deum spem habentes ut de die in diem pax et tranquillitas in terra nostra fieri deberet; verumtamen quanto plus expectavimus ut fierent uvae et pax tanto amplius labruscae succreverunt et turbatio. Unde nunc novissime Transalpinus vaivoda cui nullum ius omnino ad hoc compeţiţ cum schismaticus sit et alienus a ritu christianitatis et penitus ab unione sanctae matris ecclesiae divisus propria praesumtione et sacrilegio animo quendam Michaelem saecularem qui se plebanum in Tergavistia asserit in maximum gravamen et praeiudicium tam iuris nostri et dignitatis quam totius ordinis et monasterii in Kercz necnon vilipendium honoris maistatis serenissimi domini nostri regis ad dictum monasterium in Kercz intrusit temere et inique. Unde sentientes, quod propter nostram senectutem vires et sensus in nobis deficiunt et timentes quod huiusmodi obstaculis utiliter obviare, ut libenter vellemus non possumus, quod propterea ordini nostro et monasterio praefatis damna et pericula irrecuperabilia possent suboriri; ideoque ex bono et deliberato animo desuper prius praehabito plurimorum sapientium et literatorum virorum consilio nulla penitus interveniente pactione seu conditione aut promissione pure et simpliciter dei suae genetricis virginis Mariae nostri ordinis et monasterii praefatorum comtemplatione ipsam abbatiam monasterii in Kercz et omne ius quod nobis ad illam competiit, competit aut competere poterit quomodolibet in futurum non coacti non seducti non rogati nec ad hoc per aliquem angariati vel inducti sed sponte libere et voluntarie in utilitatem et favorem venerabilis viri domini Johannis de Bornequel, sacrae theologiae doctoris eximii qui etiam ipsum ordinem Cisterciensem est professus cum expressa approbatione et certa scientia necnon de consilio, voluntate et assensu nostri conventus monasterii in Kercz cum omnibus et singulis dictae abbatiae in Kercz iuribus, censibus, debitis, obventionibus, dominiis, bonis et rebus mobilibus et immobilibus quibuscumque nominibus intitulentur honoribus et oneribus eidem domino Johanni doctori ab eadem abbatia penitus cedentes et omnibus iuri et literis quibusvis abdicantes in dei nomine resignamus per eum pacifice et perpetue possidendam. Ita et taliter, ut sicuti nos eandem abbatiam usque ad hanc diem iure quocumque possedimus eodem iure etiam ipse dominus Johannes pacifice et perpetue debet possidere abbatiam eandem, per huiusmodi resignationem sive cessionem nobis cordis et corporis quietem, pacem et tranquillitatem ac ipsi ordini et monasterio commodum honorem et utilitatem procurare intendentes, sperantes firma concepta fiducia quod per providentiam et sagacitatem dicto [S. 30] domino Johanni doctori ab altissimo collatam dictum monasterium salubriter regis et eius negotia domino cooperante utiliter dirigi necnon ipsius monasterii et ordinis iura et privilegia strenue¹⁾ prout opus est debeant manuteneri et gubernari, promittentes nos dominus Michael resignator fide data nomine praestiti iuramenti quod deinceps ab hora et die praesenti et supra continetur per²⁾ nos²⁾ vel alium aut alios occulte vel manifeste directe vel indirecte quovis quaesito colore contra et adversus huiusmodi resignationem sive cessionem sic ut praemittitur factam facere non³⁾ velimus aut contravenire quovis modo sub poena periurii et perpetuae inhabilitatis rogando humiliter praefatum dominum Johannem de Bornequel doctorem, huiusmodi resignationem et cessionem quam nunc modo et forma ut praemittitur facimus pure propter deum et ordinis commodum et honorem ac monasterii in Kercz utilitatem ratam habeat et gratam et acceptet.


1) Vorlage strennue.^{^}
2) Mit dunkler Tinte nachgezogen.^{^}
3) Über der Zeile nachgetragen.^{^}