Urkunde Nr. 3041 aus Band V

Seite im UB:

543-544

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkunden des Burzenländer Kapitels [Capitlul evanghelic CA Ţara Bârsei] (Inventar 459), Nr. 34.

Druckvorlage:

nach Original

Abdruck als:

Volltext

Sprache:

Latein

---

3041

Gran 1456 September 24 Dionysius, Erzbischof von Gran bestätigt die Wahl des Jakobus von Schlatten zum Pfarrer von Brenndorf und ersucht die Pfarrer von Petersberg und Weidenbach, ihn in sein Amt einzuführen.

Dionisius miseratione divina sanctae Romanae ecclesiae presbiter cardinalis archiepiscopus Strigoniensis locique eiusdem comes perpetuus primas et apostolicae sedis legatus natus ac in regno Hungariae eiusdem sedis legatus de latere, dilectis nobis in Christo, honorabili viro domino Jacobo nato Johannis de Slathna, presbitero Transsiluanensis, salutem in domino et animarum tibi commissarum lucrum. Sollicitudo nostri pastoralis officii et debitum nos excitat et inducit, ut singulis ecclesiis nostrae iurisdictioni subiectis et rectoribus viduatis, ne longae vacationis ferant dispendia, per nostram providam circumspectionem pastor accedat idoneus et rector providus deputetur, qui populum sibi commissum in spiritualibus pariter et temporalibus salubriter dirigat et informet, ac ecclesiam ipsam multiplicibus tam in spiritualibus, quam temporalibus efferat incrementis. Vacante siquidem nuper parrochiali ecclesia beati Nicolai episcopi et confessoris de Bothfalwa decanatus Brassouiensis nostrae diocesis per liberam, puram et absolutam resignationem atque [S. 544] cessionem honorabilis domini Gregorii de dicta Slathna in decretis baccalarii, eiusdem ecclesiae veri, ultimi et immediati plebani, nos ad personam tuam exigentibus probitatum et virtutum tuarum meritis habentes benivolum et gratiosum respectum te tamquam personam benemeritam ad nominationem et praesentationem circumspectorum virorum villici seniorumque et totius communitatis de eadem Bothfalwa, ratione ipsorum iurispatronatus de te factas, de quibusquidem nominatione et praesentatione nobis per literas circumspectorum iudicis iuratorumque civium civitatis Brassouiensis per te coram nobis exhibitam legitimis constitit documentis in praedictam ecclesiam beati Nicolai episcopi et confessoris de dicta Bothfalwa auctoritate nostra ordinaria instituimus et confirmamus, teque per bireti nostri capiti tuo impositionem personaliter investimus et providemus de eadem, recepto tamen prius a te corporali et solito iuramento, quod nobis nostrisque successoribus canonice intrantibus fidelis et oboediens eris, ac bona eiusdem ecclesiae non alienabis, nec dissipabis seu distrahes, quinpotius alienata et distracta ad ius et proprietatem ipsius ecclesiae reduces iuxta posse, dantes tibi et concedentes tamquam vero et legitimo plebano eiusdem ecclesiae in spiritualibus et temporalibus ac animarum curam exercendi, gerendi et administrationem faciendi plenam et omnimodam potestatis facultatem. Quocirca discretis viris, dominis N. de Monte Petri et N. de Wydebah ecclesiarum plebanis, dictae nostrae diocesis, in virtute sanctae oboedientiae committimus et mandamus, quatenus te ambo aut unus ex ipsis altero absente et legitime praepedito in corporalem, realem et actualem dictae ecclesiae possessionem, auctoritate nostra imponant et inducant, impositumque et inductum tueantur et defendant ac faciant tibi et nemini alteri de universis et singulis proventibus, redditibus, obventionibus et emolumentis dictae ecclesiae per hos ad quos pertinet integre semper respondere contradictores et illicitos detentores dicta nostra auctoritate per censuram ecclesiasticam compescendo. In quorum fidem et testimonium praemissorum praesentes nostras literas fieri et sigilii nostri annularis impressionem mandavimus communiri. Datum Strigonii vicesima quarta die mensis Septembris, anno domini millesimo quadringentesimo quinquagesimo sexto.

Von der Kanzlei: Johannes Zaaz de Coloswar, notarius in praemissis.

Auf der Rückseite gleichzeitig: Forma confirmationis plebanorum.