Urkunde Nr. 3097 aus Band V

Seite im UB:

583-584

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. V, Supplementa (Nova Collectio posterior) (Inventar 27), Nr. 1158.

Druckvorlage:

nach Abschrift

Abdruck als:

Volltext

Sprache:

Latein

---

3097

Mediasch 1457 Dezember 16 Der Rat von Mediasch beglaubigt in dem Streit zwischen der Mediascher Schneiderzunft und den auch das Tuchscherergewerbe ausübenden Schneidermeistern Michael und Martin die Urkunde des Hermannstädter Rats von 1456 Nr. »3039 und entscheidet, dass in Zukunft niemand zwei Gewerbe betreiben darf.

In nomine domini amen. Ne ea quae fiunt in tempore simul et labente tempore oblivioni tradantur necessarium est, ut literarum scriptura memoriae commendentur. Nos itaque Janko Gereb, iudex, Georgius Hendel, villicus, ceterique iurati cives oppidi Megyes vocati ad universorum tam praesentium quam futurorum volentes devenire notitiam memoriae commendando¹⁾ significamus tenore praesentium quibus expedit universis, quod quamquam inter providos viros Michaelem, iuratum civem, Johannem Schnell aliumque Johannem Draudum, Petrum Gleich, Vlricum, Thomam, Ladislaum, Nicolaum ceterosque universos et singulos artis sartoriae magistros oppidi videlicet nostri cohospites ab una ex altera vero partibus antiquum Michaelem ac Martinum de Bagesdorff artificiorum sartoriae et rasoriae magistros similiter nostros commansores quaedam litis et controversiae materia pro eo, quod ipsi praenarrati magistri sartores iam dictos Michaelem et Martinum duo videlicet sartoriae et rasoriae artificia simul et semel practicare exercereque permittere nolebant, suborta et diutius tandem coram nobis actitata et ventilata extitisset, tamen nos veluti, respectum ad iura et consuetudines laudabiles septem sedium Saxonicalium habentes partes pro inquisitione²⁾ et quaestione facienda benivolo ac cum deliberato animo Cibinium transmisissemus; unde tandem abinde partes ad nos reversae nobis nonnullas literas iudicum iuratorumque consulum civitatis Cibiniensis sigillo triangulari sedis iudicis eiusdem viridi cera impresso consignatas attulerunt suprascriptione huiusmodi: Circumspectis viris iudicibus et iuratis senioribus oppidi Megyes vocati fratribus et amicis ipsorum sincere honorandis, subscriptionem autem³⁾ talem in se continentes: Iudices et iurati consules civitatis Cibiniensis. Tenor vero ipsarum literarum sine augmento et diminutione sequitur et est talis: (Folgt die Urkunde des Hermannstädter Rates von 1456 Nr. »3039). Unde nos ipsarum literarum audito pariter et intellecto tenore volentes prout tenemur praefatorum iudicum et iuratorum consulum praemissae civitatis consiliis acquiescere iuribusque et approbatis consuetudi-[S. 584] nibus hactenus in dicta civitate et septem sedibus observatis nos conformare ipsas literas quoad omnes ipsarum clausulas et articulos acceptas, ratas et gratas habendo in suisque vigore et valore permittere ratificavimus, approbavimus et confirmavimus imo ratificamus, approbamus et confirmamus et per hanc sententiam nostram definitivam iudiciariam decrevimus, quod neque praenominati antiquus Michael ac Martinus de Bogach neque alii futuris temporibus adventuri duo unquam artificia simul practicare sed unum dumtaxat illorum quod maluerint exercere debeant neque praesumant nec sint ausi modo aliquali perpetuum ipsis Michaeli et Martino silentium et aliis futuris consimilibus imponentes praesentibus vero perpetuo pro czecha et magistris artis sartoriae valituris. In quorum omnium et singulorum fidem et testimonium praesentes literas privilegiales sigilii oppidi nostri subappendente munimine roboratas ipsis magistris sartoribus et eorum successoribus futuris iuris sui ob cautelam duximus concedendas. Datum in oppido praedicto feria sexta proxima post festum beatae Luciae virginis et martiris, anno domini millesimo quadringentesimo quinquagesimo septimo.


1) Vorlage commendam.^{^}
2) Vorlage inquisitionem.^{^}
3) Vorlage aut. ^{^}