Urkunde Nr. 3180 aus Band VI

Seite im UB:

54-55

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Druckvorlage:

nach Manuskript 19. Jahrhundert

Abdruck als:

Volltext

Sprache:

Latein

---

3180

1459 April 29 Der Konvent von Kolozsmonostor bezeugt das Testament der Margarethe, Witwe des Klausenburger Bürgers Johannes Schleffer.

Nos conventus monasterii beatae Mariae virginis de Kolosmonostra memoriae commendamus, quod provida ac honesta domina Margaretha vocata, relicta Ioannis Schleffer civis civitatis Kolosvar, nostram personaliter accedens in praesentiam ex bono maturoque et deliberato animo in se praehabito vivae vocis oraculo spontaneaque voluntate confessa exstitit in hunc modum: Quod ipsa attendens perspicaci, quam caduca sit hominis vita et labilis pergens nimirum aetas opressaque mens ignorantiae caecitate, nisi divina fuerit illustrata luce neque ad superna anhelare formidans, ne repentinae et inopinatae mortis articulo superveniente intestata decedat, bona sua mobilia et immobilia inutiliter distraherentur et dilapidarentur, de eisdem bonis et rebus suis mobilibus et immobilibus a deo sibi donata et collata talem egisset testamentariam dispositionem futuris temporibus post obitum suum perpetue duraturam: Quod primo domum suam in veteri castro praedictae civitatis Kolosvar penes domum providi viri Ioannis Herman dicti situatam necnon tertium dimidium iugerum vinearum in promontorio dictae ecclesiae nostrae Koemal vocato, in vicinitatibus vinearum discreti viri Ioannis sacerdotis, filii annotati quondam Ioannis Schleffer ab una, parte siquidem ex altera providi viri Petri Balog dicti de praedicta civitate Kolosvar adiacens, eidem Ioanni sacerdoti filio scilicet suo noverco necnon discretis viris alteri Ioanni nostro ac Bartholomeo sacerdotibus de dicta civitate capellanis, item honestis dominabus Dorothea providi Jacobi Schlewnyng nec non Catharina vocatis Caspari Herman dictorum civium dictae civitatis Kluswar consortibus et puellae Gertrudis vocatae, filiae quondam Stephani inhabitatoris eiusdem civitatis Kolosvar testamentaliter reliquisset et commisisset tali modo: Ut ipsi tamquam executores praemissam domum ac dicta iugera vinearum post obitum suum venumdare seu venditioni tradere pretiumque earundem pro animae suae salute iuxta conscientiam ipsorum modo infra declarando expendere et disponere debeant. Primo missam pro defuncto per duos annos quotidie absque aliquo defectu in ecclesia parochiali beati Michaelis archangeli in saepefata civitate Kolosvar fundata sollempniter decantare faciant et teneantur, itaque numerus praedictorum integrorum duorum plenarie supleatur et ad easdem missas unam masam cerae cum media pro candelis, item ad aedificationem et structuram eiusdem ecclesiae beati Michaelis archangeli 25 florenos auri, item ad altare sancti corporis Christi mediam masam cerae, item altari beati Ioannis similiter mediam masam cerae, item capellanis dictae ecclesiae parochialis cuilibet seorsim unum florenum auri, item ad coquinam fratrum ordinis praedicatorum de claustro beatae Mariae virginis [S. 55] in saepedicta civitate Kluswar fundata 10 florenos auri, item ad aedificationem eiusdem claustri 25 florenos auri, itaque per unum integrum annum ordinarie missam pro defuncta legendam absque aliquo intervallo in eodem claustro celebrari faciant; item monialibus de claustro beati Egidii abbatis extra civitatem praedictam Kolosvar in promontorio vinearum fundato pro vestibus aut alia quavis necessitate earundem 10 florenos auri, item pauperibus in ecclesia sancti Spiritus modo simili extra eandem civitatem fundata degentibus unum vas vini, item fratribus ordinis eremitarum in claustro beatae Mariae virginis sub castro sancti Michaelis archangeli exstructo existente 5 florenos auri, item ad dictum nostrum monasterium coram valoris duorum florenorum auri pro candelis seu lucernis tempore elevationis incendendis, item annotato Ioanni sacerdoti, filio scilicet suo noverco, ad usum suum proprium 25 florenos auri, item eidem domino septem coclearia argentea, ut de eisdem sibi ipsi calicem construi faciat et pro labore eiusdem calicis 12 florenos auri, item alteri Ioanni sacerdoti capellano nostro pro usu suo proprio 6 florenos auri, item pro restitutione pauperum medica mine 16 florenos auri, item quasdam tres domunculas in curia iamfatae domus suae prope magnam ianuam seu portam eiusdem curiae penes se se condiguo adiacentes, quasquidem domunculas annotata puella Gertrudes filia Stephani nec non honesta puella Anna vocata, filia quondam de Karko¹⁾ ex consensu et voluntate praelibatae Margarethae cum ipsarum sumptibus et expensis construi fecisset, eisdem puellis cum libero egressu per dictam portam usque tempora vitae earundem testamentaliter reliquisset, imo tam easdem domunculas quam omnia alia praemissa et quaevis praemissorum singula, quod iam superius ordinatim posita sunt reliquit et commisit atque testamentaliter legavit coram nobis. Hoc tamen specificato et adiecto, quod quandocumque temporis in successu Valentinum filium quondam Andreae filii praedictae dominae Margarethae de longinquis partibus remeare contingeret et idem de praescriptis bonis et rebus praefatae dominae Margarethae partem seu portionem habere vellet et conaretur, extunc dictus Valentinus de eisdem demptis quibusdam certis rebus puta duobus iugeris vinearum in promontorio iamdictae civitatis Kolosvar Tusokmal vocato in vicinitate circumspectorum virorum Ioannis Herczeg ab occidentali, ab orientali vero partibus praenotati Jacobi Schlewnyng adiacentium nec non uno lecto cum copertorio et duobus magnis pulvinaribus ac quatuor cussinis et totidem linteaminibus, item 5 manutergiis et tribus scriptis seu cantaris plumbeis uno eorundem unum octavale, aliis vero duobus quolibet tria quartalia continentibus, item, una mensa et una scultella stannea praefatum Valentinum iure hereditario concernentibus, nullam partem seu portionem habere queat necque possit praemissamque testamentariam dispositionem nec in tot nec in parte nec iudicio nec extra iudicium infringere queat neque possit. In cuius rei testimonium praesentes literas nostras duximus concedendas. Datum die dominico proximo ante festum beatorum Jacobi et Philippi apostolorum, anno domini millesimo quadringentesimo quinquagesimo nono.


1) So Vorlage.^{^}