Urkunde Nr. 3303 aus Band VI

Seite im UB:

134-135

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Heutige Signatur:

Fond 1: Stadt Kronstadt [Primaria Municipiului Braşov], Privilegiensammlung (Colecţia privilegii) Nr. 161.

Druckvorlage:

nach Original

Abdruck als:

Volltext

Sprache:

Latein

---

3303

Kronstadt 1462 November 30 König Matthias bestimmt, dass die Heiligleichnamsbruderschaft in Kronstadt den Törzburger Kastellanen als Abgabe für die Besitzungen Zărneşti und Tohan jährlich 20 ung. Gulden zahlen soll.

Von der Kanzlei: Comissio propria domini regis.

Nos Mathias dei gratia rex Hungariae, Dalmaciae, Croaciae et cetera memoriae commendamus tenore praesentium significantes quibus expedit universis, quod venientes nostrae maiestatis in praesentiam fideles nostri cives civitatis nostrae Brassouiensis de confraternitate sacratissimi corporis Christi in ecclesia parochiali ecclesiae beatae Mariae virginis in praedicta civitate nostra Brassouiensi instituta existente, nostrae maiestati significare curarunt in hunc modum. Quod essent quaedam duae possessiones Zeernee et Thohan vocatae in terra nostra regali Barcza vocata, quae ex gratiosa dispositione divorum regum Hungariae nostrorum scilicet praedecessorum ad eandem con-[S. 135] fraternitatem sacratissimi corporis Christi tali sub adiectione pertinebant, ut cives dictae confraternitatis easdem possessiones cum omnibus et singulis proventibus, obventionibus, fructibus et emolumentis possiderent, sed ad castrum nostrum Thercz vocatum pro illius conservatione castellanis in eodem castro pro tempore constitutis annuatim triginta florenos Tartaricales iidem cives solvere deberent et tenerentur et licet iidem cives sub hac conditione dictas duas villas longo tempore pacifice possedissent, tamen orta praeterea tempore quondam illustris principis domini Johannis de Hwnyad, comitis perpetui Bistriciensis genitoris nostri carissimi felicis reminiscentiae, inter ipsos cives et castellanos dicti castri nostri dissensione et controversione ex eo, quod ipsi castellani non triginta florenos Tartaricales sed Hungaricales petebant, idem dominus genitor noster huiusmodi controversiam inter ipsos cives et castellanos arbitratus tali limitatione consopivissent, ut praedicti cives pro praefatis triginta florenis Tartaricalibus viginti tantum florenos Hungaricales et non amplius castellanis pro tempore in praedicto castro constitutis dare deberent et tenerentur, nec ipsi castellani plus petere auderent. Supplicatum itaque extitit maiestati nostrae per dictos cives ipsius confraternitatis, ut nos praefatam limitationem dicti quondam domini genitoris nostri ratam et gratam habentes, eidem etiam nostrum regium consensum praebere dignaremur pariter et assensum. Unde nos humilimis supplicationibus dictorum civium favorabiliter inclinati, vestigia etiam salutaria iam fati quondam domini genitoris nostri sequi cupientes praesertim ob eam devotionem, qua ipsi confraternitati tam salubriter institutae afficimur, praefatum limitationem dicti quondam domini genitoris nostri ratam es gratam habentes, eidem etiam nostrum regium consensum praebuimus praebemusque benevolum pariter et assensum. Ita regio nostro iudicio decernentes, ut a modo deinceps cives dictae confraternitatis praedictas duas possenssiones Zernee et Thohan vocatas cum omnibus proventibus et obventionibus earundem libere possideant nomine dictae confraternitatis et singulis annis solvant castellanis dicti castri nostri Thercz tantummodo viginti florenos auri Hungaricales, nec ipsi castellani praefatos cives aut incolas dictarum duarum possessionum ad aliquam aliam solutionem compellere possint. Quocirca vobis fidelibus nostris castellanis praetacti castri nostri Thercz nunc constitutis et in futurum constituendis harum serie firmiter praecipientes mandamus, quatenus receptis praesentibus a modo in posterum praenotatos cives dictae confraternitatis ad maiorem solutionem dictorum viginti florenorum auri arctare et adstringere vel propterea easdem possessiones ac populos et iobagiones in eisdem commorantes in personis rebusque et bonis eorum quibusvis impedire, molestare, perturbare vel dampnificare nusquam et nequaquam praesumatis nec sitis ausi modo aliquali. Praesentes autem quas secreto sigillo nostro, quo ut rex Hungariae utimur in appenso communiri fecimus, post earum lecturam semper reddi iubemus manibus exhibentis. Datum Brassouiae praedictae in festo beati Andreae apostoli, anno domini millesimo quadringentesimo sexagesimo secundo.

Auf der Rückseite von gleichzeitiger Hand: Confirmatio regis Mathiae Zernee et Thuhan.