Urkunde Nr. 1867 aus Band IV

Seite im UB:

105-108 ^a)

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

1867

Ofen 1419 August 20 König Sigmund befiehlt dem Bischof von Siebenbürgen und den Adligen von Oşorheiu/Gyerövásárhely, von den Klausenburgern keinerlei Abgaben zu erheben, bzw. den Nachweis zu führen, dass ihnen der Zoll von Rechts wegen zusteht.

Von der Kanzlei: Commissio propria domini regis.

Sig¹⁾ismundus dei gratia Romanorum rex semper augustus ac Hungariae, Dalmaciae, Croaciae et cetera rex fidelibus nostris universis et singulis praelatis, baronibus, comitibus, castellanis, nobilibus ipsorumque officialibus item civitatibus et liberis villis ipsarumque rectoribus, iudicibus et villicis, cunctis etiam aliis regni nostri possessionatis hominibus tributum habentibus et tenentibus eorundemque tributariis praesentium notitiam habituris et praesertim reverendi in Christo patri domino episcopo Transsiluano pro tempore existenti et nobilibus de Wasarhel salutem et gratiam. In personis fidelium nostrorum dilectorum, circumspectorum et providorum virorum iudicis ac iuratorum civium, incolarum et inhabitatorum civitatis nostrae Cluswar vocatae nostrae gravi sub querela datur intelligi maiestati, quod displicenter intelleximus, quod quamvis ipsi et eorum quilibet resque et bona ipsorum quacumque antiqua eorum libertate ipsis et eorum cuilibet per divos reges Hungariae felicium reminiscentiarum, nostros scilicet praedecessores, efficacissimorum literalium instrumentorum vigoribus data et concessa a qualibet solutione tributaria seu solutionis tributariae onere in quorumcumque tributis tam nostris, videlicet regalibus ac [S. 106] reginalibus, quam aliorum quorumvis et praesertim in partibus Transsiluanis ubilibet habitis perpetue gratiose exempti sint et emancipati, uti etiam hoc ex continentiis literarum nostrarum privilegialium anno domini millesimo CCC^o nonagesimo primo, tertio kalendas mensis Aprilis, regni autem nostri anno quinto emanatarum,¹⁾ tenorem et continentiam quarundam literarum quondam excellentissimorum principum dominorum Karuli ac Lodouici regum Hungariae, nostrorum scilicet praedecessorum, divi recordii super perennali exemptione et absolutione praemissae solutionis tributariae ipsis exponentibus gratiose datarum et concessarum confirmative in se habentium per eosdem exponentes coram nobis in specie productarum et exhibitarum vidimus contineri, tamen nunc nonnulli forent ex vobis et praesertim partium nostrarum Transsiluanarum praedictarum hominibus et eorum tributarii, qui huiusmodi libertatibus ipsorum, eis ut praedicitur datis gratiose et concessis et per nos confirmative roboratis, minime attentis, easdem contemptibiliter infringere non verentes quadam abusiva consuetudine immo potius coruptela adinventa et introducta ab ipsis et eorum rebus et bonis tributum seu solutionem tributariam exigerent et extorquerent exigique et extorqueri facere non cessarent incessanter in eorundem fidelium nostrorum exponentium praedictorum praeiudicium ac damnum dictaeque libertatis ipsorum praerogativae derogamen nostraeque maiestatis displicentiam multum grande. Supplicatum itaque exstitit nostrae claritatis pro parte eorundem iudicis, iuratorum civium et totius communitatis civitatis nostrae praetactae humiliter et devote, quatenus ipsis circa praemissa dignaremur opportune providere. Et quia gloria principis in multitudine populorum decoratur idemque princeps taliter suae dilectionis sinum populis sibi subiectis adaperire debet, ut ipsi beneficiorum largitate invilati numero semper et fidelitate augentur, ideo nos oppressiones ac damna praescriptorum exponentium fideliorum²⁾ nobis grate dilectorum, quae ipsi in exactione praedictae tributariae solutionis contra ipsorum praemissas antiquas libertates per praedictos reges Hungariae, nostros ut praefertur praedecessores, ipsis datas et per nos confirmatas perferunt non sine mentis nostrae turbatione animadvertentes, eosdem iudicem et iuratos cives et totam dictae civitatis nostrae communitatem et eorum quemlibet in praetactis eorum libertatibus ac exemptionibus gratiosis et indultis specialibus quibuslibet et praesertim in facto exemptionis dictae solutionis tributariae, ipsis saepe dicto modo per nostros praedecessores concessis et per nos confirmatis, irrefragabiliter volentes conservare ac per vos et quemlibet vestrum facere conservari, ut ipsi sicuti fidelitate sic et opum ubertate gratulando ad nostrae maiestatis servitia se promptiores possint conservare vestrae univer- [S. 107] sitatis et vestrum cuiuslibet fidelitati firmissimo nostro regio damus sub edicto mandantes districte, quatenus dum et quandocumque praefatos iudicem ac cives et hospites memoratae nostrae civitatis Cluswar vel eorum alterum cum rebus eorum mercimonialibus et aliis quibusvis ad dictorum tributorum vestrorum loco vel alterius vestrum pervenire contigerit et signanter in dictis partibus nostris Transsiluanis ex tunc ipsos vel eorum alterum hominesque et familiares ipsorum quodcumque tributum seu solutionem tributariam de eorum personis propriis aut equis, curribus et aliis rebus eorum mercimonialibus et ceteris quibuscumque ac familiaribus ipsorum vel eorum alterius huiusmodi bona conducentibus contra et ultra formam praemissae libertatis ipsorum praerogativae recipere, petere, exigere petique aut exigi facere nullatenus praesumatis nec sitis ausi modo aliquali. Alioquin commisimus et serie praesentium firmissime committimus fidelibus nostris vaivodae vel vicevaivodae praedictarum partium nostrarum Transsiluanarum aut comitibus vel vicecomitibus illorum comitatuum, in quo vel in quibus praemissa nostra mandata non observarentur¹⁾ et in quorumque tributis seu tributo huiusmodi tributum seu solutio tributaria aut quodcumque munus occasione huiusmodi tributariae solutionis ab eisdem civibus vel eorum altero rebusque et bonis ipsorum mercimonialibus supra dictis aut familiaribus ipsorum easdem res conducentibus invite exactum seu receptum aut aliquid damni eis illatum et irrogatum hocque per ipsos vel eorum alterum comprobatum fuerit, ex tunc praedicti vaivoda vel vicevaivoda aut comes vel vicecomes supra dicti seu alter ipsorum, qui praesentibus fuerint requisiti seu alter eorum fuerit requisitus, super universis damnis et rerum ablationibus per huiusmodi tributarios eisdem exponentibus vel eorum alteri illatis satisfactionem exhibere et impendere et huiusmodi tributum pro nostra maiestate occupare occupatumque tamdiu nomine nostro regio conservare debeant et teneantur quousque aliud superinde a nostra maiestate habuerint seu habuerit in mandatis. Volumus etiam et praesentibus decernimus, ut quicumque homo possessionatus a praedictis nostris civibus ac familiaribus et rebus ipsorum tributum exigere voluerit, talis super tributo suo iura seu literalia sua instrumenta, vigore quorum huiusmodi tributum se tenere et exigere posse allegaverit, quod in praesentia eorundem vaivodae vel vicevaivodae aut comitis vel vicecomitis talis comitatus in quo causa seu quaestionis materia praevia ratione suscitari contigerit, producere debeat et teneatur, quibus et²⁾ examinatis iidem vaivoda vel vicevaivoda aut comes vel vicecomes in causis talibus et earum articulis finem facere valeat decisivum. Secus igitur prout praeter praemissa nostrae maiestatis indignationem cupitis evitari facere non ausuri in praemissis nес audeant modo aliquali. [S. 108] Praesentes etiam post earum lecturam semper reddi iubemus exhibenti. Datum Budae, in festo beati regis Stephani, anno domini millesimo quadringentesimo decimo nono, regnorum nostrorum anno Hungariae et cetera tricesimo tertio, Romanorum vero nono.

Unter dem Siegel: Commissio propria domini regis.

Auf der Rückseite von einer Hand des 15. Jahrhunderts: Absolutio tributi¹⁾ inserta privilegio et confirmatione regis²⁾ Sigismundi.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1 auf S. 105, 1-2 auf S. 106, 1-2 auf S. 107, 1-2 auf S. 108 (dortige 3-4 zu nachfolgender Urkunde).^{^}
[S. 105]
1) In verzierter Ausführung. ^{^}
[S. 106]
1) Vgl. Nr. »1768. ^{^}
2) So Vorlage.^{^}
[S. 107]
1) Vorlage: obsuarentur.^{^}
2) Hierauf: et.^{^}
[S. 108]
1) Hierauf mit anderer Tinte weiter.^{^}
2) Hierauf Lad durchgestrichen.^{^}