Urkunde Nr. 1926 aus Band IV

Seite im UB:

182-184 ^a)

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Kirchenarchive A.B. [Colecţia de documente ale parohiilor ev. CA săseşti] Serie I (Inventar 223), Nr. 204 - Abt. 13: K. A. Mediasch [Parohia Ev. CA Mediaş], Nr. 15 (alt Nr. 32).

Druckvorlage:

nach Einschaltung (Insert)

Abdruck als:

Volltext

Sprache:

Latein

---

1926

Hermannstadt 1423 Februar 22 Die Sieben Stühle entscheiden den Streit zwischen Comes Nikolaus und Verwandten und den Bewohnern von Mediasch um das Mühlen- und Wasserrecht in diesem Ort.

Nos iudices et iurati seniores universique iustitiarii septem sedium Saxonicalium partium Transsiluanarum memoriae commendamus, significamus tenore praesentium quibus expedit universis, quod nobis in congregatione nostra¹¹⁾ generali in civitate Cibiniensi circa festum sanctae Katherinae¹²⁾ celebrata simul constitutis comparuerunt [S. 183] in nostra praesentia providi viri comes Nicolaus et Petrus frater eiusdem filii quondam comitis Johannis de Meggyes ac Clemens sororius praedictorum parte ab una, ab altera vero villicus et iurati cives oppidi ante dicti in ipsorum ac totius communitatis personis coram nobis diutius litigantes propositumque exstitit per Nicolaum, Petrum et Clementem praefatos, quomodo ipsi in molendino trium rotarum infra oppidum praenotatum constructo ius ab antiquo percipiendi in singulis expositionibus et distributionibus annonae octo cubulos habuissent et nunc cives et communitas oppidi praetacti eosdem octo cubulos dare recusarent. Nihilominus etiam proposuerunt, quomodo cives et communitas ante fati in molendino ipsorum duarum rotarum superius oppidum constructo ipsos impedirent et constructionem tertiae rotae prohiberent ac etiam locum unius lapidis lapsorii in oppido ab antiquo constitutum ipsis pariformiter denegarent in ipsorum praeiudicium nimis magnum. Petierunt itaque supra tacti Nicolaus, Petrus et Clemens ipsis de iuris remedio provideri. Ex adverso vero villicus et iurati cives oppidi saepe dicti responderunt, quod verum quidem esset, quod comiti Johanni felicis reminiscentiae patri videlicet Nicolai et Petri praedictorum propter fidelia ipsius servitia, per quae intrepide communitati et civibus tempore suo studuit complacere, primo quatuor cubuli annonae in singulis expositionibus ex favore dati fuissent, tandem propter benemerita eiusdem alii quatuor cubuli Petro praedicto filio comitis Johannis gratiose et favorabiliter fuissent assignati sub tali conditione, quod in omnibus negotiis communitatem et oppidum Meggyes praetactum tangentibus ubicumque locorum constitutis per unam dietam ab oppido equitando quo pervenire posset equitare et negotia communitatis fideliter agere et expedire deberet suis propriis laboribus et expensis. Quod si comes Nicolaus praenotatus hanc conditionem sub ea forma uti scriptum est servare et adimplere promiserit, eosdem octo cubulos annonae, qui ex favore dati fuerunt, eidem et consequenter dare nullatenus recusarent. De molendino vero praedictarum duarum rotarum sic responderunt, quod non aliud ius in molendino ipsorum habuissent, nisi tantum unam rotam molendi annonam et secundam rotam pro usu et artificio textorum vulgariter walkrat vocatam habuissent, quare constructionem tertiae rotae sive conversationem rotae textorum in rotam molitionis annonae iuridice prohiberent. Praesertim tamen dicebant aedificationem novi molendini pro utilitate communitatis in fluvio ipsorum per comites praelibatos velle impedire petieruntque iidem villicus et cives de Meggyes praedicta in persona communitatis eos in suis iuribus et provinciae legibus conservare. Nos itaque auditis propositionibus, responsionibus et allegationibus partium praedictarum inter partes utrasque laborando de consensu ambarum talem fecimus concordiam et pacis unionem, quod comes Nicolaus supradictus in singulis distributionibus et exceptionibus annonae de molendino trium rotarum inferiori octo cubulos recipere deberet et conditionem supra scriptam [S. 184] adimplere, sic videlicet, quod sub suis expensis equitare tenetur et facta oppidi expedire quotienscumque requisitus fuerit ad tantam videlicet distantiam, quod uno die ab oppido praedicto usque ad locum ubi negotium versatur equitare poterit commodose. Et hoc idem statuimus et volumus post comitem Nicolaum in posteros suos filios filiorum videlicet et propinquiores nationis eius, qui utiliores videbuntur et per communitatem ad hoc electi fuerint, derivari. Quod si fortassis sequentes comitem Nicolaum in factis et expediendis oppidi et communitatis negligentes fuerint aut conditionem praemissam servare recusaverint, ex tunc communitas et seniores oppidi saepe fati a datione annonae debent esse absoluti. Nihilominus etiam volumus et statuimus, quod comites praedicti molendinum ipsorum superius oppidum constructum sub ea forma, velut ab antiquo conservatum est, tenere et habere debent nihil novi construentes aut immutantes. Teneant itaque unam rotam pro molitione annonae et secundam pro usu textorum valentem et lapidem lapsorii siculi ius ipsorum per cives oppidi supra tacti exstitit demonstratum. Adiudicavimus etiam et senioribus ac communitati praelibatis praesentium per vigorem potestatem tribuimus secundum iura et consuetudines nostras observatas novum aedificandi molendinum et utendi aqua per medium oppidi fluente pro ipsorum utilitate absque tamen impedimento molendini prioris sic videlicet, quod molendinum comitum ante fatorum in decursibus rotarum suarum impedimentum nullatenus patiatur, neque propter alicuius alterius aedificii sive ante molendinum ipsorum sive post constructionem in suo transitu recipiat nocumentum, harum nostrarum testimonio literarum. Datum feria secunda proxima post dominicam primam quadragesimae, qua cantatur Invocavit, anno domini millesimo quadringentesimo vigesimo tertio, nostro minori sub sigillo.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 11-12 auf S. 182 (1-10 zu voranstehender Urkunde).^{^}

11) 1457: nostri.^{^}
12) November 25. ^{^}