Urkunde Nr. 2097 aus Band IV

Seite im UB:

405-406

Heute in:

Budapest, Ungarisches Landesarchiv [Magyar Országos Levéltár]

Heutige Signatur:

DL (Diplomatikai Léveltár) 74049 - Familienarchiv Teleki zu Neumarkt (Családi levéltárak, Teleki család, marosvásárhelyi) Nr. 577.

Druckvorlage:

nach Original

Abdruck als:

Volltext

Sprache:

Latein

---

2097

Wien 1430 Juli 19 König Sigmund beauftragt Ladislaus, den Woiwoden von Siebenbürgen, im Verein mit den Sachsen und den beiden Seklergrafen Johann und Michael Jakch, einen Aufstand der Sekler niederzuwerfen.

Von der Kanzlei: Commissio propria domini regis.

Sigismundus dei gratia Romanorum rex semper augustus ac Hungariae, Bohemiae, Dalmaciae, Croaciae et cetera rex fideli nostro magnifico Ladislao de Chaak partium nostrarum Transsiluanarum vaivodae salutem et gratiam. Ad nostrae maiestatis devenit audientiam, quod dolenter gerimus, quomodo nonnulli immo fere omnes Siculi ipsarum partium nostrarum Transsiluanarum elatis cornibus superbiae et cervicibus proterviae extensis simul et in unum conspirantes iam nonnullas villas et possessiones quorundam nobilium dictarum par- [S. 406] tium nostrarum Transsiluanarum ignis incendio consumpserunt, quorundam etiam nobilium possessiones et terras metis earundem dispersis et abolitis pro se occupaverunt et alia multa mala in partibus illis temeraria eorum praesumptione mediante nequiter et rebelliter perpetrarunt in nostrae maiestatis displicentiam regnicolarumque¹⁾ nostrorum contemptum et notabile ac grave detrimentum. Et nisi talis modi perniciosorum actuum eorum habenae concite comprimantur, timendum est, quod et per amplius maiorem sument et attentabunt audaciam malignandi. Unde quia non est conveniens, ut huiuscemodi rebellionis praesumptio ipsis Siculis ulterius admittatur committendi ideo mandavimus per alias literas nostras fidelibus nostris magnificis Johanni et Mychaeli Jakch de Kwssal comitibus ipsorum Siculorum nostrorum, ut ipsi in medium dictorum Siculorum personaliter accedentes et super praemissis certitudinis veritatem capientes eosdem Siculos ad satisfaciendum in hac parte illis, contra quos deliquerunt compellant et astringant. Si qui vero ex eisdem iuri et iustitiae astare ipsorumque comitum iussioni et iudicio parere noluerint, tales per omnia opportuna remedia etiam sumpta maiori eorum potentia, quam habere poterunt vestroque subsidio et auxilio concurrente, ad omnem obedientiam et satisfactionem cogant et compellant ab ulterioribus quoque inferendis et patrandis coerceant et compescant. Quapropter fidelitati vestrae firmo nostro regio sub edicto praecipimus et aliter habere nolentes mandamus, quatenus praemissis rebus sic stantibus, si et dum necesse fuerit vosque per dictos comites Siculorum nostrorum fueritis requisiti, statim et sine mora vos cum universis vestris gentibus necnon omnibus Saxonibus partium nostrarum Transsiluanarum praedictarum, quibus etiam serie aliarum literarum nostrarum scripsimus et mandavimus in subsidium ipsorum comitum Siculorum nostrorum illac quo necesse fuerit pro reprimenda dictorum Siculorum protervia et rebellione pariter cum ipsis comitibus Siculorum procedere et proficisci debeatis. Secus gratiae nostrae sub obtentu facere non ausuri. Datum Vyennae, feria quarta proxima ante festum beatae Mariae Magdalenae, anno domini M^o CCCC^o XXX^o, regnorum nostrorum anno Hungariae et cetera XLIIII^to, Romanorum vigesimo et Bohemiae decimo.


1) que nachgetragen.^{^}